Sekula menua ulu patut beratka subjek Jaku English, Sains enggau Matematik
Cari Berita

Advertisement


Sekula menua ulu patut beratka subjek Jaku English, Sains enggau Matematik

Staf @beritaibanMY
May 2, 2018

Dato Gerawat Gala.

LONG MOH: Sekula menua ulu patut nguasa subjek Jaku English, Sains enggau Matematik ngambika mayuh agi nembiak sekula ari Baram nampung pelajar ba kus teknologi enggau injinir di palan pelajar tinggi.

Kaban Kunsil Nengeri (ADUN) Mulu ke lalu nyadi Sapit Speaker Aum Kunsil Nengeri (DUN), Dato Gerawat Gala madah, nya kebuah sekula primari di menua ulu bisi pangku pengawa besai amat ba pengawa meransang bala nembiak sekula nguasa subjek nya kenyau ari renggat sekula primari.

Ku iya, antara tagit Opis Menteri Pelajar iya nya nambahka penyampau tubuh tauka nisbah bala nembiak sekula Bumiputera, nyengkaum Orang Ulu ngambika nampung pelajar ba kus Sains, Teknologi nyengkaum Teknologi Digital, Injinir enggau Matematik di renggat palan pelajar tinggi.

“Nisbah bansa Bumiputera ti diterima nampung pelajar ba kus Sains, Matematik enggau Teknologi di renggat pelajar tinggi diatu kurang ari 10 peratus. Tu mih siti pekara ke alai kepala pengajar, bala pengajar enggau Serakup Apai Indai enggau Pengajar (PIBG) patut bekerejasama dikena nambahka penyulut dijapai bala nembiak sekula.”

Gerawat mansutka jaku tu lebuh bejadika Pekit Lumba Zon Mit Baram LITUMOS ti ngaul Sekula Primari (SK) Lio Mato, SK Lg Tungan, SK Long Moh enggau SK Long Sait di Long Moh apin lama ke udah.

Ku iya, ubah ekonomi menua majak ngemeratka pengawa bekenaka sains enggau teknologi canggih ti bisi digital deka ngubah makit kereja.

“Dipelaba manggai 80 peratus kereja begaji besai jemah belalauka sains enggau teknologi,” ku iya.

Gerawat mega madahka empat buah sekula LITUMOS tauka zon ti ngembuan beberapa buah sekula di sitak Baram nyangka deka dipegulai nyadi sebuah sekula di baruh Program Rasionalisyen Sekula serataSarawak.

“Randau antara Opis Menteri Pelajar enggau PIBG sekula bekaul iya nya SK Long Moh, SK Long Tungan, SK Long Sait enggau SK Lio Mato deka diatur sebedau opis menteri nya ngaga pemutus,” ku iya.

Ba lansa bukai, iya meri pengaga ati ngagai kaban komiti ti udah diketuaika Kelumin Lidam ke nyadi kepala pengajar SK Long Moh enggau semua komiti ba pemujur sida ngatur lumba nya.

Gerawat ngarapka lumba tu ulih ngansah penau baru ba bidang lumba lalu nyadi pengari LITUMOS di renggat Zon Baram.

Iya mega bisi ngemendarka agih belanja penyampau RM10,000 di baruh Projek Mit Pemansang Menua Pesisir (MRP) ungkup LITUMOS nganjung atlit ngagai renggat Zon Baram lalu bela penyampau RM5,000 agi ngagai empat PIBG LITUMOS enggat atur pemutus Ujian Pencapaian Sekolah Rendah (UPSR) taun tu meseti nyulut agi ari taun 2017 tauka enti pemutus nurun, geran nya deka dibatak pulai.

Kelimpah ari nya, geran RM5,000 ungkup Raban Indu Long Moh Lepo’ Ngau, Yay enggau Jengan. #UtusanBorneo