Siku lelaki mati kena pantap ketegal bini bisi sulu lalai - Berita Iban Online

Header Ads

  • Baru Nyadi

    Siku lelaki mati kena pantap ketegal bini bisi sulu lalai

    Bini mansa ke benung digiga raban Polis. 📷 #Polis

    TAWAU: Siku lelaki mati kena pantap dipelabaka dibunuh pangan laki bini iya di Blok 03, Kampung Murai, Ladang Kretam, Tawau, pagi kemari.

    Maya penusah nyadi urung jam 11 pagi, mansa ke dikelala enggau nama Amir Mappiase, 35 taun, mati ketegal balat bakal pengudah kena pantap ba rekung.

    Ketuai Polis Pampang Tawau, Asisten Komisioner Fadil Marsus madahka bisi nerima ripot ari menijar laki ke meda siku bangkai lelaki ke dipechayaka pekereja ladang gegaring sereta kena balut darah urung jam 1.15 tengah hari.

    “Nitihka pansik tumu, mansa nya baru pulai ke rumah bisi meda suspek begulai enggau bini iya di rumah seduai iya sebedau mansa enggau supsek nya belaya.

    “Suspek beumur 21 taun dipechayaka mantap rekung mansa ngena duku, pengudah nya iya lalu ngelarika diri nengah pintu belakang nuju ke ladang sawit” ku iya nerangka raban pengarang berita seharitu tadi.

    Berebak enggau nya, Fadil madahka asil penerang sereta bantu peranak kampung nya enggau raban Balai Polis Kalabakan udah mujur nangkap suspek ke benung belalai di ladang nya, penyauh dua kilometer ari palan penusah nyadi.

    Ku iya, polis mega bisi tetemuka tiga iti duku panjai tauka pedang pemanjai 44, 53 enggau 70 sentimeter dipechayaka kena suspek mantap mansa nya.

    “Mansa nya penatai ari Indonesia ke gawa di ladang nya pengelama sembilan taun tang suspek nya gawa dia baru ka setaun lebih.

    “Raban Polis diatu benung begigaka bini mansa ke dikelala enggau nama Ani Beddu, 42 taun, penatai ari Indonesia kena mantu enggau mansik kes tu laban indu nya dipechayaka ngelarika diri pengudah kes nyadi,” ku iya.

    Fadil madahka Polis pechaya kebuah tauka motif kes nyadi bepun ari dipelabaka bisi "sulu lalai" enggau suspek ianya bini mansa nya empu.

    Kes tu dipansik ari baruh Seksyen 302 Kanun Keseksaan, nyema ditemu salah ukum gantung sampai mati.

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads