Siku raban polis bebadi ketegal eksiden di KM2, Jalai Gedong-Serian - Berita Iban Online

Header Ads

  • Baru Nyadi

    Siku raban polis bebadi ketegal eksiden di KM2, Jalai Gedong-Serian

    Gambar ba palan penusah kenyadi, lemai kemari.

    SERIAN: Siku raban polis bebadi ketegal eksiden di KM2, Jalai Gedong-Serian, lemai kemari.

    Maya nya nyadi, urung jam 4.20 lemai entara sebuah kereta Proton Saga enggau motosikal ke ditepan mansa ke dikelala enggau nama Angat Dusi, beumur 59 taun, gawa di Cawangan Akademik, Pusat Latihan Polis Kuching (PULAPOL).

    Ketuai Opis Tasat enggau Penguasa Trafik Sarawak, Superintenden Alexson Naga Chabu madah mansa nya bebadi ba palan penusah kenyadi ketegal balat bakal ba tubuh.

    "Sebedau penusah nyadi, mansa kediri aja nepan motosikal Yamaha Lagenda ari Serian nuju ke Gedong", ku iya.

    "Maya nengah siti jalai betiku, motosikal ke ditepan mansa nya dipechayaka tepawah lalu nengah jalai ke ngelaban arus ngejungka iya belantak enggau sebuah kereta ke benung mansang ari muak penatai.

    "Mansa nya dipelabaka tepelanting ba atas jalai lalu ngejungka iya balat bakal ba tubuh sebedau mansa nya disahka bebadi ba palan penusah kenyadi", ku iya nerangka bala raban pengarang berita kemari.

    Taja pia, siku deriba enggau siku penumpang kereta nya diripotka selamat tauka nadai bakal ba tubuh.

    "Tubuh tauka bangkai mansa udah dianjung ke Sepital Serian awakka diperesa nyentuk agi", tandu Alexson.

    "Kes tu dipansik ari baruh Seksyen 41 (1) Akta Pengangkutan Jalan 1987," ku iya.

    Kami ari raban BeritaIban.com ngarapka semua bala ke sepintu bilik enggau niang ulih ngeringka ati napi penguji tu. 😢

    Taja niang udah niki ke langit, penyiru, penyinu sereta pementas enggau pemanah basa niang maya idup enda mudah lela ari pengingat kitai semua belama. RIP.. 😇

    Petara sigi ngibun sereta ngintu iya ba pengidup ti baru din. Besampi ngagai Petara ti bemulia awakka semengat niang begulai manah enggau iya di Serega.. 🙏

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads