Subsidi RM10 dikemendar ungkup tambang ekspres di Sibu enggau Kapit - Berita Iban Online

Header Ads

  • Baru Nyadi

    Subsidi RM10 dikemendar ungkup tambang ekspres di Sibu enggau Kapit

    Richard Tajan

    KUCHING: Perintah Nengeri Sarawak kena 24 Mei tu tadi udah ngemendarka subsidi penyampau RM10 ngujungka rega tambang bot ekspres bisi niki mimit di Sibu enggau Kapit ke diterit berengkah ensana nyentuk 31 Mei tu.

    Kenu ku Kontroler Kaunsil Sungai-sungai Sarawak (SRB), Richard Tajan nya berindik ari peminta bala tauke bot ekspres apin lama ke udah nikika tambang urung RM10 iya nya ari RM25 sekali pejalai ngagai RM35 beserimbai enggau musim kemisi ke menua.

    “Bala Operator Bot Ekspres di Sibu enggau Kapit bisi minya tambang ditiki ari RM25 ngagai RM35 laban deka nyendiaka servis mayuh agi pejalai nyerumba pengerami Hari Gawai enda lama agi.

    “Taja pia, nengah pemisi subsidi tu penumpang lebih agi ba sitak menua pesisir semina patut mayar tambang ke sebaka enggau rega ngelama tu iya nya RM25 ungkup sekali pejalai lalu enda ibuh nitihka rega ke udah diletak operator bot,” ku iya.

    Pemadas iya pengawa meri subsidi nya dikena ngurangka ungkus belanja penumpang bot maya deka pulai ke menua asal diri nyerumba pengerami Hari Gawai.
    Tu mega jalai mutarka penanggul rega tambang niki ungkup penumpang bot ekspress.

    Piak sida ngarap pengawa ngemanahka agi sukut pengelikun ba kandang terminal ulih dipejaika piak operator kelimpah nyaga penyampau penumpang nitihka pemyauh tatak ngambi nyeliah penusah enda disadang.

    Piak perintah nengeri ngarap nengah subsidi nya nyadi deka meri pengaga ati ngagai rayat lebih agi orang tuai ke pulai ke menua beserimbai enggau pengerami Gawai taun tu, ku iya.

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads