Abdul Karim tekenyit ninga penemu dipansutka Masing deka ngena duit galau nengeri - Berita Iban Online

Header Ads

  • Baru Nyadi

    Abdul Karim tekenyit ninga penemu dipansutka Masing deka ngena duit galau nengeri

    Datuk Abdul Karim Rahman Hamzah

    KUCHING: Menteri Dagang Temuai, Seni, Main Asal, Nembiak Lumba enggau Main, Datuk Abdul Karim Rahman Hamzah madahka iya tekenyit enggau penerang ari Sapit Kepala Menteri Tan Sri Datuk Amar James Masing ti merambu melanjaka duit galau RM31 bilion sebedau pengawa bepilih nengeri tu ila.

    Ku iya, semadi mih jaku perambu nya tundi, Masing endang udah kelalu jauh limpang ari penemu iya, ti enda manah ngagai sida ti biak enggau bala pengundi sereta peranak Sarawak ti ngembuan pelajar.

    “Terang madah, aku tekenyit lebuh aku macha penerang sehari tu (kemari) lalu aku nemu semua peranak Sarawak ngasaika pekara ke sama mega. Tu endang nadai tanggungpengawa taja ngaga perambu ke alai sebansa dikena meransang polisi bumi dalam perang ke alai soldadu ti undur ngerampas lalu munaska tanah kebun bekal ai, kuasa karan sebedau nyurutka diri, semina dikena nagang munsuh ari ngasaika iya,” ku Abdul Karim madah nyemetak kemari.

    Iya mansutka jaku nya nimbal perambu Masing ti dekaka perintah nengeri ngena duit galau nengeri RM31 bilion sebedau pengawa bepilih nengeri laban nangika duit nya dikena perintah baru, enti sema Gabungan Parti Sarawak (GPS) lenyau kuasa.

    Abdul Karim, ke mega Kaban Kunsil Nengeri (ADUN) Asajaya ngasaika perintah patut anang ngenaka duit galau nya sepeneka ati semina ketegal enggaika duit nya labuh ngagai jari orang bukai.

    “Ari mit kitai dilatih bekelimat ngena belanja ngambika naruh duit dikena maya tusah lalu enti sema GPS alah, kitai patut ngempu tanggungpengawa ba duit galau nengeri tu laban tu duit rayat,” ku iya seraya nambah, ke alai udah dilalau endang ukai pekara betul.

    Iya mega madah nyemetak, iya bela ningkah sereta tekenyit ke alai ketuai parti komponen perintah nengeri nadai pengandal ulih menang bepilih nengeri, meseti diatur dalam taun 2021, seraya nambah semengat agi idup agi ngelaban meseti dikemeran. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads