Bejalai 'Niti Daun' nadai kaul enggau politik, ku Dr Rundi - Berita Iban Online

Header Ads

  • Baru Nyadi

    Bejalai 'Niti Daun' nadai kaul enggau politik, ku Dr Rundi

    Datuk Seri Dr Stephen Rundi Utom.

    KUCHING: Bejalai Bebala mayuh Gawai Dayak 2018 tauka ‘Niti Daun’ sebengkah program dikena ngerami Gawai Dayak taun tu ungkup semua Dayak nyadi siti komuniti, nadai kaul enggau doktrin politik.

    Menteri Utiliti ti mega nyadi Chairman Komiti Pengatur Pengerami Gawai Dayak 2018, Datuk Seri Dr Stephen Rundi Utom madah, ngarapka pengerami nya ke ungkup semua enda dipolitikka.

    “Tu dikena ngerami Gawai ungkup semua Dayak nyadi siti komuniti sereta nadai bekaul enggau doktrin politik.

    “Kami ngangauka semua pengari rayat Dayak enda ngira gempung politik sama ngambi bagi.

    “Tulung mih sekali tu anang ngirit semua utai ke dalam politik. Ambis nadai beri awak diri ngasaika runding ti lantang nyadi raban bansa ti sayauka pemaik enggau pengelantang,” ku iya madah ngagai Utusan Borneo, kemari.

    Dr Rundi mansutka pekara nya lebuh dipinta meri penerang bekaul enggau penerang ke dikerembaika nengah media rama baka nengah aplikasyen WhatsApp ti madahka program bejalai nya tauka dikumbai Niti Daun bisi motif politik ke pemerat Gabungan Parti Sarawak (GPS).

    Sebedau tu, ba aum pengarang berita kena 24 Mei 2018, Dr Rundi madahka Program Bejalai Bebala Mayuh Gawai Dayak tauka Niti Daun siti ari tiga program ke diatur nyerumba pengerami Gawai Dayak taun tu, kelimpah ari program Bazar Gawai Dayak ke diatur ba bagi Menua Kuching, Sibu enggau Bintulu sereta pengerami serumpu Makai Lemai Gawai Dayak 2018 kena 23 Jun tu.

    Pengerami Gawai Dayak Renggat Nengeri, iya nya pengerami ke diintu Perintah Nengeri Sarawak enggau kerejasama tiga komuniti besai Dayak ba nengeri tu iya nya Iban, Bidayuh enggau Orang Ulu.

    Pengawa ngintu Pengarami Gawai Dayak Renggat Nengeri Sarawak tu berengkah diatur ba taun 1987 ke alai tiga komuniti besai iya nya Iban, Bidayuh enggau Orang Ulu deka begintir nyadi Tuai Gawai.

    Lalu taun tu pengerami Gawai Dayak Renggat Nengeri Taun 2018 diketuaika komuniti Iban, pengudah komuniti Orang Ulu nyadi tuai Gawai ba taun 2017. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads