Header Ads

  • Berita Tebaru

    Gabungan Parti Sarawak nganti BN Sarawak

    Abang Johari dalam aum pengarang berita madahka empat parti pansut BN lalu numbuhka GPS.


    KUCHING: Parti Pesaka Bumiputera Bersatu (PBB), Parti Rakyat Sarawak (PRS), Parti Rakyat Bersatu Sarawak (SUPP) enggau Parti Demokratik Progresif (PDP) pansut ari Barisan Nasional (BN) lalu numbuhka Gabungan Parti Sarawak (GPS).

    Pekara nya dipadahka Presiden PBB, Datuk Patinggi Abang Johari Tun Openg asil ari pemutus ke udah digaga begulai enggau Presiden PRS, Tan Sri Datuk Amar Dr James Jemut Masing, Presiden SUPP, Datuk Dr Sim Kui Hian enggau Presiden PDP, Datuk Seri Tiong King Sing.

    "Parti komponen BN Sarawak iya nya PBB, SUPP, PRS enggau PDP udah selubang penemu ninggalka BN lalu numbuhka serakup baru parti iya nya GPS.

    "Pemutus tu digaga pengudah berunding sereta meda pemansang politik menua diatu udah tembu Pengawa Bepilih Besai Ke-14 (PRU14).

    "Kami pechaya sereta arap bendar enggau pengawa numbuhka serakup baru tu ulih sereta ngenegapka kitai meri servis ti lebih engkeman ngagai rayat senipak enggau juluk enggau peneka rayat Sarawak," ku Abang Johari dalam aum pengarang berita pengudah baum Majlis Teritinggi BN Sarawak ke penudi, seharitu.

    Aum Majlis Tertinggi nya diatur pengelama urung dua jam, berengkah ari pukul 10 pagi, seharitu.

    Sama bisi datai Sapit Presiden PBB, Datuk Amar Douglas Uggah Embas enggau Datuk Amar Awang Tengah Ali Hasan (PBB); Datuk Seri Richard Riot Jaem (SUPP) enggau Datuk Nelson Balang Rining (PDP), lalu Sekretari Besai Parti iya nya Datuk Alexander Nanta Linggi (PBB); Datuk Joseph Salang Gandum (PRS); Datuk Sebastian Ting (SUPP) enggau Datuk Anthony Nogeh Gumbek (PDP).

    Nambahka nya, Ketuai Raban Indu PBB Dato Sri Fatimah Abdullah mega bisi datai ngagai aum nya.

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: