Header Ads

  • Berita Tebaru

    Gerija Anglika ngatur program dikena ngingatka penumbuh ke-170 taun

    Rev Danald anak Jute

    KUCHING: Gerija Anglika deka ngepunka atur program pengelama setaun dikena ngingatka penumbuh ke-170 taun di Borneo, ujung minggu tu.

    Berambaika leka jaku ‘Mencapai Kehadapan’, pengerami nya deka nyambut penatai Rev Dr Francis Thomas McDougall di Sarawak kena 29 Jun 1848 ngambika ngiring Institusyen Raban Gerija Borneo.

    “Tang tu ukai semina sentang Francis McDougall aja. Tu mega sentang bini iya, Harriette enggau mayuh agi raban bukai ke betaun - taun udah datai  meri pengidup sida enggau tuju Injil.

    “Sekali agi, tu ukai semina sentang Injil, laban Gerija Anglika di Borneo udah meri empas ngagai tetiap bidang pengidup kitai.

    “Pengelama dalam sejarah, gerija udah bejalaika  pengawa ke beguna amat dalam bidang pelajar enggau nyaga pengerai.

    “Mayuh  ketuai politik, dagang, korporat enggau sivil kitai, ari suba enggau ke diatu udah belajar ba sekula Jalai Pengarap, sekalika ba renggat baruh tauka sekondari,” ku Bishop Gerija Anglika di Sarawak enggau Brunei, Rev Danald anak Jute ba penerang berita kemari.

    Ku iya, pengerami nya mega ukai ngelui ari nostalgia ketegal deka meda baru 170 taun ke udah, lalu mega nyadi titik pengemun ke pengidup jemah, sekalika ba individu tauka gerija, ngambika majak bisi pemerat ba pengidup rayat enggau menua.

    “Nyadi orang ke megai pengarap, tu mih juluk kitai ngambika majak diberekat ngagai menua, dikena numbuhka daya pengidup ti dikesayau sereta dibasa, ke alai pengelurus enggau pengelikun siti perintah kemaya hari tu,” ku iya.

    Pagila (9 Jun), deka diatur forum ‘Bishop Kuching - ‘Past, Present and Future’ di Pullman Kuching ari jam 9 pagi nyentuk 1 ngalih hari, ke alai 1,000 iku pengari dipelaba datai.

    Bala speaker maya nya baka Danald, Rt Revd Bolly Lapok, Rt Revd Aeries Sumping Jingan, Revd Andrew Shie, Revd Ivor Lim enggau Heidi Munan.

    Bisi mega pemandang fotografi ti mantai jeman kelia,ke diatu enggau jemah ila Gerija Anglika.

    Kena Hari Enam mega, ari jam 6.30 lemai nyentuk 9.30 malam, bisi diatur Malam Pengerami di Gerija St Thomas, Jalai McDougall nyengkaum sekeda program bukai ke manah.

    Sampi Meri Teima Kasih mega deka diatur kena Hari Minggu (10 Jun) berengkah jam 4 lemai. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: