Header Ads

  • Berita Tebaru

    GPS dikearap enda nunda chara BN

    Tan Sri Datuk Amar Dr James Jemut Masing

    KUCHING: Parti Rakyat Sarawak (PRS) nukuka empat penetap ba perambu numbuh siti parti ti ngarika genap pupu bansa di Sarawak.

    Presiden iya, Tan Sri Datuk Amar Dr James Jemut Masing madah empat penetap nya berat sereta meseti dititih enti deka meda parti ti ngarika genap pupu bansa nya nyapai juluk ti dikedeka.

    Pekara nya ku Masing ke mega Sapit Kepala Menteri ulih nyeliah gempung parti dalam perintah nengeri arika napi penanggul ba Pengawa Bepilih Nengeri (PRN) 2021.

    “Kitai setuju atur ngempung semua empat parti lalu merambu numbuhka siti parti. Tang PRS nukuka empat penetap ke ulih ngemujur pekara nya.

    “Enti siti parti ti ngarika semua pupu bansa, Gabungan Parti Sarawak (GPS) nunda chara Barisan Nasional (BN), PRS enda arapka chara tu.

    “PRS enda rinduka atur ngembuan siti parti besai ba dalam siti gempung baka parti UMNO. Kebuah BN alah bepilih ukai ketegal gempung nya enda manah, tang ketegal UMNO nguasa semua pekara,” ku Masing.

    Iya mansutka jaku nya ba aum pengarang berita pengudah nyadi chairman aum supreme kunsil parti di Indu Opis PRS di Jalai Wan Alwi ditu, kemari.

    Penetap ke satu ku Masing iya nya bala kaban kunsil nengeri (Adun) ari siti parti ba dalam gempung nya patut enda lebih ari setengah ari penyampau semua ADUN nengeri tu.

    “Diatu kitai bisi 82 ADUN lalu PRS netapka penyampau Adun ari siti parti enda ulih lebih ari setengah. Enti lebih, sida ulih numbuhka perintah nengah majoriti mudah.

    “Enti pekara nya nyadi, gempung tu nadai mai reti ke alai konsep bekunsi kuasa nadai dikemeran,” ku Masing.

    Entara penetap bukai ti dipinta PRS iya nya ngaga struktur baru ba raban orang ke mangku pengawa perintah.

    Kebuah pia ku Masing, PRS ngasai struktur ke diatu enda mandangka fabrik sosial komuniti Sarawak.

    “Kelimpah ari nya PRS dekaka refomasyen ba tanah NCR diadu enggau lengkas ngambika peranak Sarawak enda ngira etnik bisi tanah ungkup diri.

    “Keempat, Sarawak sebengkah nengeri ti diarika bemacham pupu bansa ke alai majoriti rayat megai pengarap Kristian, Budha engga Hindu lalu ketegal nya sida meseti diintu nitihka pematut.

    “Berindik enggau nya, Perintah Sarawak meseti nyendia bajet ninting taun ngagai UNIFOR ngambi tau disadung ngagai tetiap bengkah gerempung jalai pengarap lalu nentuka sida ulih meranka pengarap diri enggau enda ditagang,” ku Masing.

    Iya netapka parti ti ngarika genap pupu bansa nya deka diarika Parti Pesaka Bumiputera Bersatu (PBB), Parti Rakyat Sarawak (PRS), Parti Se’ Ati Rakyat Sarawak (SUPP) enggau Parti Progresif Demokratik (PDP).

    Pekara nya keterubah dipejurai rambau aum BN Sarawak kepenudi kena 12 Jun tu tadi iya nya maya empat parti dalam gempung mutus nyelara diri ari BN lalu numbuhka GPS.

    Nitihka penerang Masing, PBB baka ke enda nyukung perambu nya ke alai SUPP enggau PDP semina diau diri aja. #UtusanBorneo

    No comments

    Post Top Ad