‘Hari besai deka datai’, ku Entulu - Berita Iban Online

Header Ads

  • Baru Nyadi

    ‘Hari besai deka datai’, ku Entulu

    Datuk Joseph Entulu Belaun

    KUCHING: “Hari besai deka datai.” Semina nya jaku dipansutka Datuk Joseph Entulu Belaun lebuh ditanya pasal chara iya pengudah parti komponen ba Sarawak pansut ari Barisan Nasional (BN) lalu numbuhka Gabungan Parti Sarawak (GPS).
    .
    Entulu ti kala nyadi Sapit Presiden Parti Rakyat Sarawak (PRS) mega enggai ngenang pasal penumbuh GPS ti nyerakupka PRS, Parti Pesaka Bumiputera Bersatu (PBB), Parti Rakyat Bersatu Sarawak (SUPP) enggau Parti Demokratik Progresif (PDP).

    Iya ti kala nyadi menteri ba Opis Menteri Besai enggau kala nyadi Kaban Parlimen Selangau dikerandau lebuh ke ngabang ngagai Rumah Terbuka Hari Raya Ketua Menteri, Datuk Patinggi Abang Johari Tun Openg di Pusat Konvensyen Borneo Kuching (BCCK) ditu, kemari.

    Sama bisi enggau Entulu datai ngabang, Edward Kurik ti kala nyadi Kaban Kaunsil Tinggi PRS enggau Richard Will Uban ti kala nyadi chairman PRS Senadin enggau kala nyadi Sekretari Politik Kepala Menteri.

    Entulu enggau Edward bela ditingkil ari PRS bulan April tu tadi ulih Komiti Khas parti nya, ke alai chairman Komiti Khas nya ke mega Presiden PRS, Tan Sri James Jemut Masing madahka kebuah muai sida ketegal ti enda nerima pemutus parti.

    Sama  dipecat ti kala nyadi Kaban Parlimen Lubok Antu Datuk William Nyalau Badak sereta Kaban Kaunsil Tinggi PRS ke bukai iya nya Nyempah Sabot,enggau Adriana Chumang.

    Pengudah nya, Richard begulai enggau kaban komiti PRS Senadin mega nikilka diri nyadi kaban parti nya laban ti enda pechayaka iring Masing ti mega Sapit Kepala Menteri.

    Ba pengerami  Rumah Terbuka Hari Raya Ketua Menteri, Entulu ke datai urung pukul 2 lemai disambut sereta dibai Abang Johari duduk makai ba meja VIP lalu seduai iya mega dipeda berandauka pekara pengelama urung 15 minit. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads