#InjilSeharitu: 14 June 2018, Hari Empat ba Minggu Ke Sepuluh Musim Selama - Berita Iban Online

Header Ads

  • Baru Nyadi

    #InjilSeharitu: 14 June 2018, Hari Empat ba Minggu Ke Sepuluh Musim Selama

    Ku Jesus bejaku ngagai bala murid Iya:“Laban, Aku madah ngagai kita, enti kita enda lebih agi lurus ari sida pengajar Adat enggau orang Parisi, kita enda ulih tama Perintah serega. - Matthew 5: 20 - 26

    14 June 2018 - Hari Empat ba Minggu Ke Sepuluh Musim Selama

    Bacha Ke Satu:

    1 Raja 18: 41 - 46

    Udah nya Elijah lalu bejaku ngagai Raja Ahap, “Alai nuan makai. Aku bisi ninga munyi auh ujan datai.”

    Lebuh Ahap mansang makai, Elijah niki ngagai tuchung Bukit Karmel. Dia iya lalu meremika diri ke tanah. Pala iya ba entara patung iya.

    Ku iya bejaku ngagai orang gaji iya, “Uji perening tunga ke tasik.” Orang gaji iya mupuk, lalu pulai baru. Ku iya, “Nadai aku meda utai.” Elijah ngasuh iya ninjau tujuh kali.

    Chukup ketujuh kali, orang gaji nya pulai, lalu ku iya, “Aku bisi meda siti mua hari mesai tapa jari, datai ari tasik.” Elijah lalu bejaku ngagai orang gaji iya, “Alai nuan mansang ngagai Raja Ahap, lalu asuh iya nepan kerita perang iya, lalu pulai, enggai ke iya tepagang laban ujan.”

    Enda lama udah nya langit nyau chelum laban mua hari. Ribut belabuh muput, lalu hari bangat amat ujan. Ahap nepan kerita perang iya, lalu mupuk pulai ngagai Jesril.

    Kuasa TUHAN lalu datai ngagai Elijah. Iya nyintalka gari iya erat ba punggung iya, lalu belanda dulu ari Ahap nyentuk ngagai Jesril.

    Masmur Entara:

    Masmur 65: 9, 10, 11 - 12

    Saut (peda 1a): O Allah Taala, kami endang patut muji Nuan di Sion.

    Ke Satu
    Nuan ngayanka diri sinu ati ke menua lebuh Nuan ngasuh hari ujan.
    Nuan ngasuh menua ami.
    Nuan ngisi sungai enggau ai.
    Nuan ngasuh utai tumbuh.

    Saut: O Allah Taala, kami endang patut muji Nuan di Sion.

    Ke Dua
    Nuan ngasuh ai ujan manjah tanah ti udah dichangkul lalu ngasuh tanah serap diisi ai.
    Nuan ngasuh tanah lembut ngena ujan ti mesi-mesi lalu ngasuh utai ti ditanam tumbuh.

    Saut: O Allah Taala, kami endang patut muji Nuan di Sion.

    Ke Tiga
    Naka meh pemayuh utai ti diasuh Nuan ketau kami!
    Nuan meri kami mayuh utai di sebarang endur Nuan bejalai.
    Padang rumput nyau penuh laban jelu tupi.
    Serimbing bukit nyau penuh laban pengaga.

    Saut: O Allah Taala, kami endang patut muji Nuan di Sion.

    Alleluia (peda John 13: 34)

    Alleluia, alleluia
    Aku meri kita pesan ti baru:
    rinduka pangan diri baka Aku ke udah rinduka kita.
    Alleluia.

    Bacha Injil

    Matthew 5: 20 - 26

    Ku Jesus bejaku ngagai bala murid Iya:
    “Laban, Aku madah ngagai kita, enti kita enda lebih agi lurus ari sida pengajar Adat enggau orang Parisi, kita enda ulih tama Perintah serega.

    Kita udah ninga pasal utai ti udah dipadahka ngagai orang ke dulu kelia, ‘Anang munuh orang; barang sapa munuh orang deka kena pechara.’

    Tang Aku madah ngagai kita, enti kita ringat ngagai menyadi lelaki tauka menyadi indu kita enggau nadai kebuah-buah, kita deka kena pechara; lalu enti kita ngeleseka menyadi kita, kita deka dibai ngagai Kunsil; lalu enti kita nyebut, ‘Nuan tu beli’, kita deka dibuai ngagai api neraka.

    Nya alai lebuh kita deka meri pemeri kita ba alta, lalu teingatka menyadi lelaki tauka menyadi indu kita bisi enda nyamai ati ngagai kita, tinggalka pemeri kita dia di mua alta, bebaik dulu enggau iya, udah nya baru kita mansang lalu meri pemeri kita.

    Bebaik enggau naka penyampat enggau orang ke bedawaka kita, lebuh kita benung mansang ngagai kot, enggai ke iya nyerahka kita ngagai hakim, lalu hakim nyerahka kita ngagai jejaga, lalu kita ditutup dalam rumah jil.

    Enggau bendar Aku madah ngagai kita, kita enda ulih pansut ari rumah jil nya datai ke kita udah mayar semua utang kita.”

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads