#InjilSeharitu: 15 June 2018, Hari Lima ba Minggu Ke Sepuluh Musim Selama - Berita Iban Online

Header Ads

  • Baru Nyadi

    #InjilSeharitu: 15 June 2018, Hari Lima ba Minggu Ke Sepuluh Musim Selama

    INJIL SEHARITU: Ku Jesus bejaku ngagai bala murid Iya: “Kita udah ninga jaku ti munyi tu, ‘Anang butang.’

    15 June 2018 - Hari Lima ba Minggu Ke Sepuluh Musim Selama

    Bacha Ke Satu:

    1 Raja 19: 9A, 11 - 16

    Ba Sinai, bukit ti kudus, Elijah lalu tama ngagai siti lubang gua, lalu bemalam dia. Tekala nya TUHAN lalu bejaku ngagai iya,
    “Pansut nuan, lalu bediri di mua Aku ba atas bukit,” ku TUHAN bejaku ngagai iya.

    Udah nya TUHAN mansa, lalu ngasuh ribut ti deras datai, ti mechahka bukit, lalu mambarka batu, tang TUHAN nadai dalam ribut nya. Ribut nya ngetu muput. Udah nya tanah lalu berenyang, tang TUHAN nadai dalam tanah ti berenyang nya.

    Udah bekau tanah berenyang, api lalu datai, tang TUHAN nadai dalam api nya. Lebuh api udah datai, nyawa lalu bisi betelai.

    Lebuh Elijah ninga nya, iya mampul mua diri ngena kelambi iya, lalu pansut, lalu bediri ba mua lubang gua nya. Nyawa siti lalu bejaku enggau iya, “Elijah, nama pengawa nuan ditu?”

    Ku Elijah nyaut, “TUHAN ti Pemadu Bekuasa, aku endang seruran betuaika Nuan siku aja. Tang orang Israel udah ngelanggar sempekat sida enggau Nuan, udah ngeruntuhka alta Nuan, lalu munuh semua bala nabi Nuan. Ka semina siku aku aja agi tinggal, lalu sida nguji munuh aku.”

    Ku TUHAN bejaku, “Alai nuan pulai ngagai menua puang semak Damaskus, udah nya tama ngagai nengeri nya, lalu tata Hasael nyadi raja menua Siria.

    Tata mega Jehu anak Nimsi nyadi raja menua Israel, lalu tata mega Elisa anak Sapat ari Abel-meholah nganti nuan nyadi nabi.

    Masmur Entara:

    Masmur 27: 7 - 8A, 8B - 9ABC, 13 - 14

    Saut (peda 8b): Aku lelengau deka meda mua Nuan, O TUHAN.

    Ke Satu
    Dingaka aku, TUHAN, lebuh aku ngangauka Nuan!
    Kasihka aku, lalu saut meh aku!
    Lebuh Nuan nyebut, ‘Datai kitu lalu sembah Aku.’

    Saut: Aku lelengau deka meda mua Nuan, O TUHAN.

    Ke Dua
    Aku deka datai, TUHAN.
    Anang ngelalaika Diri ari aku!
    Anang ringat ngagai aku.
    Anang nulak nembiak Nuan.
    Nuan udah nulung aku. Anang ninggalka aku.

    Saut: Aku lelengau deka meda mua Nuan, O TUHAN.

    Ke Tiga
    Aku nemu diri deka idup lalu meda pemadas TUHAN
    dalam pengidup tu.
    Panggaika pengarap ba TUHAN.
    Kering sereta berani; Panggaika pengarap ba TUHAN.

    Saut: Aku lelengau deka meda mua Nuan, O TUHAN.

    Alleluia (peda Pilipi 2: 15D, 16A)

    Alleluia, alleluia
    Kita manchar baka bintang di dunya tu,
    enti kita bepegai teguh ba jaku ti meri pengidup.
    Alleluia.

    Bacha Injil

    Matthew 5: 27 - 32

    Ku Jesus bejaku ngagai bala murid Iya:
    “Kita udah ninga jaku ti munyi tu, ‘Anang butang.’

    Tang Aku madah ngagai kita, barang sapa merening ngagai indu enggau ati ti kamah, udah butang enggau indu nya dalam ati iya.
    Enti mata kanan nuan mai nuan bedosa, keruk lalu buai iya! Manah agi nuan lenyau sebagi ari perengka tubuh nuan, ari ke nejuka semua tubuh nuan dibuai ngagai neraka.

    Lalu enti jari kanan nuan mai nuan bedosa, tetak lalu buai iya! Manah agi nuan lenyau jari sepiak, ari ke nejuka semua tubuh nuan dibuai ngagai neraka.

    “Jaku tu udah mega disebut, ‘Barang sapa muai bini, enda tau enda meri bini iya surat sarak.’

    Tang Aku madah ngagai kita, genap iku orang ke muai bini, kelimpah ari bini iya butang, deka ngujungka bini iya butang, lalu barang sapa jadi enggau indu ke udah sarak, butang.”

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads