Header Ads

  • Berita Tebaru

    #InjilSeharitu: 16 June 2018 - Hari Enam ba Minggu Ke Sepuluh Musim Selama

    Ku Jesus bejaku ngagai bala murid Iya: “Kita udah mega ninga pasal jaku ti udah disebut ngagai orang ke dulu kelia, ‘Anang bulaka semaya, tang kereja utai ti udah disemaya kita enggau Tuhan.’


    16 June 2018 - Hari Enam ba Minggu Ke Sepuluh Musim Selama

    Bacha Ke Satu:

    1 Raja 19: 19 - 21

    Elijah angkat lalu nemu Elisa benung ngeradu tanah ngena sepasang jelu sapi ti lelaki. Sebelas pasang jelu sapi bejalai dulu ari iya. Pasang ti dikena iya ngeradu tanah nya pasang ti penudi. Elijah muka kelambi iya, lalu ngerasukka kelambi nya ba Elisa.

    Elisa lalu ninggalka jelu sapi iya, belanda nitihka Elijah. Ku iya, “Awakka aku meri selamat tinggal ngagai apai enggau indai aku. Udah nya baru aku bejalai enggau nuan.” Disaut Elijah, “Pulai meh nuan dulu. Enda aku nagang nuan!”

    Udah nya Elisa mansang ngagai sapi iya, munuh sapi dua iku nya, lalu manduk dagin jelu nya, ngena kungkung sapi nya empu nyadika kayu api. Iya meri dagin nya ngagai orang mayuh, lalu sida makai. Udah nya iya mupuk, lalu nitihka Elijah, lalu nyadi penulung iya.

    Masmur Entara:

    Masmur 16: 1 - 2A & 5AB, 7 - 8, 9 - 10

    Saut (peda 5a): Semina Nuan aja ke dikemisi aku, O TUHAN.

    Ke Satu
    Jaga aku, O Allah Taala. Aku ngarapka Nuan meri aku pengelikun.
    Aku nyebut ngagai TUHAN, “Nuan TUHAN aku.
    Semina Nuan aja, TUHAN, ke dikemisi aku
    lalu Nuan meri aku semua utai ti dipeguna aku.

    Saut: Semina Nuan aja ke dikemisi aku, O TUHAN.

    Ke Dua
    Aku muji TUHAN, laban Iya ngiring aku,
    lalu lebuh malam hari ati aku empu ngajar aku.
    Aku seruran nemu TUHAN bisi enggau aku.
    Iya semak aku, lalu nadai utai ulih ngelebuka aku.

    Saut: Semina Nuan aja ke dikemisi aku, O TUHAN.

    Ke Tiga
    Nya alai aku meri terima kasih sereta gaga ati,
    lalu aku berasai likun,
    laban Nuan nyaga aku ari kuasa pemati.
    Aku udah betuaika Nuan enggau ati ti tetap,
    lalu Nuan enda ninggalka aku di dunya pemati.

    Saut: Semina Nuan aja ke dikemisi aku, O TUHAN.

    Alleluia (peda Masmur 119: 36A, 29B)

    Alleluia, alleluia
    Asuh ati aku inginka adat Nuan, O Allah Taala;
    lalu ajar aku adat Nuan.
    Alleluia.

    Bacha Injil

    Matthew 5: 33 - 37

    Ku Jesus bejaku ngagai bala murid Iya:
    “Kita udah mega ninga pasal jaku ti udah disebut ngagai orang ke dulu kelia, ‘Anang bulaka semaya, tang kereja utai ti udah disemaya kita enggau Tuhan.’

    Tang Aku madah ngagai kita: anang besumpah, nemuka atas nama serega, laban nya kerusi diraja Allah Taala, tauka atas nama dunya, laban nya pelasar ke kaki Iya, tauka atas nama Jerusalem, laban nya nengeri Raja ti besai.

    Lalu anang besumpah atas pala kita empu, laban kita enda ulih ngaga indah selambar buk kita burak tauka chelum.

    Semina sebut aja ‘Au’ tauka ‘Enggai’. Utai ti lebih ari nya datai ari Sitan.”

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: