Header Ads

  • Berita Tebaru

    #InjilSeharitu: 20 June 2018 - Hari Tiga ba Minggu Ke Sebelas Musim Selama

    “Anang ngereja pengawa agama di mua orang mayuh, minta diri dipeda sida, laban enti kita ngereja nya, kita nadai bulih upah ari Apai kita ti di serega.

    20 June 2018 - Hari Tiga ba Minggu Ke Sebelas Musim Selama

    Bacha Ke Satu:

    2 Raja 2: 1, 6 - 14

    Maya pen nyau datai alai TUHAN deka ngambi Elijah niki ke serega ngena ribut pulas uchung. Elijah seduai Elisa mupuk ari Gilgal.

    Udah nya Elijah lalu bejaku enggau Elisa, “Nuan tinggal ditu. TUHAN udah ngasuh aku mansang ngagai Sungai Jordan.” Tang ku Elisa nyaut, “Aku besumpah atas nama TUHAN ti idup, enggau penaluk aku ke nuan, aku enggai ninggalka nuan.” Nya alai seduai iya majak bejalai, dititihka lima puluh iku nabi, ngagai Sungai Jordan. Elijah seduai Elisa lalu ngetu ba tebing sungai nya, lalu bala nabi nya bediri enda jauh ari seduai iya.

    Elijah lalu muka kelambi iya, ngulungka kelambi nya lalu maluka kelambi nya ngagai ai Sungai Jordan. Ai nya lalu bebagi dua, lalu seduai iya meraka ke seberai nengah tanah ti rangkai.

    Dia Elijah lalu bejaku enggau Elisa, “Padahka ngagai aku utai ti diasuh nuan kereja aku ke nuan, sebedau aku dibai ari tu.” “Beri ngagai aku dua kali lipat kuasa nuan ngambika aku ulih nganti nuan,” ko Elisa nyaut.

    “Utai ti dipinta nuan nya mar diberi aku,” ku Elijah nyaut. “Tang nuan deka nerima utai nya, enti nuan meda aku diambi ari nuan. Enti nuan nadai meda aku, nuan enda nerima utai nya.”

    Lebuh seduai iya benung bejalai, seduai iya majak berandau. Tekala nya kerita api ti ditarit kuda api datai, ensaraka seduai iya, lalu Elijah ditabanka idup-idup ke serega ulih ribut pulas uchung.

    Elisa meda utai nya nyadi, lalu ngangauka Elijah, “Apai! Apai! Penyaga orang Israel ti bekuasa! Nadai meh nuan agi enggau aku!” Lalu iya nadai agi meda Elijah. Elisa tusah amat ati, lalu nyarikka kelambi iya belah dua.

    Iya ngambi kelambi Elijah ti udah labuh ari tubuh Elijah. Elisa pulai, lalu bediri ba tebing Sungai Jordan.

    Iya malu ai sungai nya ngena kelambi Elijah, lalu ku iya bejaku, “Dini alai TUHAN Allah Taala Elijah?” Udah nya iya lalu malu ai nya baru. Ai nya lalu bebagi dua, lalu iya bejalai ke seberai meraka sungai nya.

    Masmur Entara:

    Masmur 31: 19, 20, 23

    Saut (peda 24): Seruran kering, seruran berani, semua kita ke andal ati ke TUHAN.

    Ke Satu
    Naka meh pemanah utai ti badas
    ti disimpan Nuan ke orang ke ngemesaika Nuan!
    Semua orang nemu pemadas Nuan,
    pasal Nuan ke nyaga enggau likun
    orang ke manggaika pengarap sida ba Nuan.

    Saut: Seruran kering, seruran berani, semua kita ke andal ati ke TUHAN.

    Ke Dua
    Nuan ngelalaika sida ba endur Nuan Empu
    lalu ngibun sida likun ari akal orang bukai.
    Nuan ngelalaika sida ngambika sida likun ari jaku pechat munsuh.

    Saut: Seruran kering, seruran berani, semua kita ke andal ati ke TUHAN.

    Ke Tiga
    Rindu meh kita ke TUHAN, semua kita ke nembiak Iya.
    TUHAN nyaga orang ke tetap ati,
    tang ngukum orang ke sumbung nitihka penyumbung sida.

    Saut: Seruran kering, seruran berani, semua kita ke andal ati ke TUHAN.

    Alleluia (peda John 14: 23)

    Alleluia, alleluia
    Orang ke rinduka Aku deka ngasika pesan Aku,
    lalu Apai Aku deka rinduka iya,
    lalu kami duai Apai deka datai ngagai iya.
    Alleluia.

    Bacha Injil

    Matthew 6: 1 - 6, 16 - 18

    Ku Jesus bejaku ngagai bala murid Iya:
    “Anang ngereja pengawa agama di mua orang mayuh, minta diri dipeda sida, laban enti kita ngereja nya, kita nadai bulih upah ari Apai kita ti di serega.

    Nya alai, lebuh kita meri sedekah ngagai orang ke suntuk, anang mandangka diri ngereja nya baka ti dikereja orang ke pura-pura ngapa dalam balai gempuru tauka ba sebelah jalai raya, minta diri dipuji mensia. Enggau bendar Aku madah ngagai kita, sida udah nerima upah sida.

    Tang lebuh kita meri sedekah ngagai orang ke suntuk, anang nejuka jari kiba kita nemu utai ti dikereja jari kanan kita, ngambika pengawa nya dikereja kita belalai, lalu Apai kita ti meda utai ti dikereja kita belalai, deka ngupah kita.

    “Lalu lebuh kita besampi, anang baka orang ke pura-pura ngapa, laban sida rindu bediri lalu besampi dalam balai gempuru, enggau ba sukut jalai raya, minta diri dipeda orang. Enggau bendar Aku madah ngagai kita, sida udah nerima upah sida.

    Tang lebuh kita besampi, tama ke bilik, tikupka pintu, lalu besampi ngagai Apai kita ti enda dipeda. Lalu Apai kita ti meda utai ti dikereja kita belalai, deka ngupah kita.

    “Lalu lebuh kita bepasa, anang ngayanka mua ti tusah, baka orang ke pura-pura ngapa,laban sida ngurik mua diri ngambika orang nemu sida bepasa. Enggau bendar Aku madah ngagai kita, sida udah nerima upah sida.

    Tang lebuh kita bepasa, empungas mua kita, lalu sugu buk kita, ngambika orang enda nemu kita bepasa, tang semina dipeda Apai kita ti enda dipeda, lalu Apai kita ti meda utai ti dikereja kita belalai, deka ngupah kita.

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: