#InjilSeharitu: 21 June 2018 - Hari Empat ba Minggu Ke Sebelas Musim Selama - Berita Iban Online

Header Ads

  • Baru Nyadi

    #InjilSeharitu: 21 June 2018 - Hari Empat ba Minggu Ke Sebelas Musim Selama

    “Laban enti kita ngampun orang ke salah enggau kita, Apai kita ti di serega deka mega ngampun penyalah kita.

    21 June 2018 - Hari Empat ba Minggu Ke Sebelas Musim Selama (Memorial of Saint Aloysius Gonzaga, Religious)

    Bacha Ke Satu:

    Sirak 48: 1 - 14

    Lalu datai Nabi Elijah, siku nabi ke beapi-api. Jaku iya baka sempun api ti mau.

    Iya ngasuh penusah kebeluran lapar datai nuntung bansa iya empu. Ketegal iya meh mayuh orang bansa sida empu merinsa dataika mimit aja ti agi idup.

    Bejaku dalam nama Tuhan iya nagang ujan turun, lalu ngasuh api datai tiga kali.

    Kereja ajih nuan, Nabi Elijah, chukup nyelai amat. Nadai siku orang ulih ngaga utai baka nuan.

    Ngena kuasa Tuhan ti Pemadu Tinggi nuan ngidupka orang ke mati.

    Nuan ngerusak bala raja lalu ngelabuhka orang ke benama ari kuasa sida.

    Di Bukit Sinai nuan ninga jaku rara Tuhan, lalu ba Bukit Horeb nuan ninga pemutus Iya deka ngukum bala munsuh Iya.

    Nuan milih siku raja bejalaika ukum, lalu milih siku nabi nganti nuan.

    Nyadi nuan empu diangkat ke serega dalam ribut pulau uchung ti idup baka api ngena kereta ditarit kuda ti beapi-api.

    Dalam Bup Kudus bisi ditulis madahka nuan deka datai baru ba maya ti udah diletak, ngambi neduhka pengeringat Allah Taala, sebedau Iya mandangka pengeringat diri. Bisi mega ditulis madahka nuan deka mai pemaik entara apai enggau anak sereta mai raban Israel badas baru.

    Beberekat meh orang ke ulih meda penatai nuan, lalu pia mega sida ke parai dalam pengasih, laban kitai tetap deka idup.

    Elijah dibungkur ribut ti bepusin, lalu kuasa roh iya tama Elisa. Sekumbang iya idup Elisa enda kala takut ke orang ke bekuasa, lalu enda kala alah laban sebarang orang.

    Nadai utai mar ba iya. Seumur idup iya, Elisa ngereja pengawa ajih, lalu taja udah parai tubuh agi ngaga kereja ajih.

    Masmur Entara:

    Masmur 97: 1 - 2, 3 - 4, 5 - 6, 7

    Saut (peda 12a): Gaga ati meh semua kita ke lurus ketegal utai ti udah dikereja TUHAN!

    Ke Satu
    TUHAN endang Raja! Dunya, awakka ati nuan gaga! Rami gaga ati meh kita menua ti ba tebing tasik! Iya dikelingi mua hari enggau pemetang. Iya merintah ngena pengelurus enggau atur ti betul.

    Saut: Gaga ati meh semua kita ke lurus ketegal utai ti udah dikereja TUHAN!

    Ke Dua
    Api bejalai di mua Iya lalu nganguska munsuh ti ngelingi Iya. Kilat Iya ngenampakka dunya. Dunya meda kilat nya, lalu begetar.

    Saut: Gaga ati meh semua kita ke lurus ketegal utai ti udah dikereja TUHAN!

    Ke Tiga
    Bukit luluh baka lilin, di mua TUHAN,
    di mua TUHAN ti bekuasa atas semua dunya. Serega madahka pasal pengelurus Iya, lalu semua bansa meda mulia Iya.

    Saut: Gaga ati meh semua kita ke lurus ketegal utai ti udah dikereja TUHAN!

    Ke Empat
    Semua orang ke nyembah engkeramba dipechat magang. Semua petara meremi di mua TUHAN.

    Saut: Gaga ati meh semua kita ke lurus ketegal utai ti udah dikereja TUHAN!

    Alleluia (peda Rome 8: 15BC)

    Alleluia, alleluia
    Kita udah nerima Roh ti ngiru kita nyadi anak Allah Taala. Lebuh kitai ngangau, “Abba! Apai!
    Alleluia.

    Bacha Injil

    Matthew 6: 7 - 15

    Ku Jesus bejaku ngagai bala murid Iya:
    “Lebuh kita besampi, anang besebutka mayuh macham leka jaku ti nadai reti baka orang bansa bukai, ke ngumbai sampi sida didinga  laban sampi sida panjai.

    Anang baka nya, laban Apai kita nemu utai ti dipeguna kita sebedau kita minta ari Iya.

    Nya alai, baka tu ku chara kita patut besampi:

    ‘Apai kami ti di serega: Kudus meh nama Nuan. Datai meh Perintah Nuan. Nyadi meh peneka Nuan di dunya enggau di serega.
    Beri ngagai kami sehari tu pemakai umbas dipakai kami. Ampun kami penyalah kami, baka kami ke ngampun orang ke salah enggau kami. Lalu anang mai kami ngagai penguji, tang lepaska kami ari penyai.

    “Laban enti kita ngampun orang ke salah enggau kita, Apai kita ti di serega deka mega ngampun penyalah kita.

    Tang enti kita enggai ngampun orang ke salah enggau kita, Apai kita pen enggai mega ngampun penyalah kita.”

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads