Header Ads

  • Berita Tebaru

    #InjilSeharitu: Hari Enam, 9 June 2018 ba Minggu Kesembilan Musim Selama

    INJIL SEHARI TU: Tiga hari udah bekau nya, nya baru seduai iya tetemuka Iya dalam Rumah Sembiang, duduk enggau bala pengajar, mendingka sida, sereta betanyaka utai ngagai sida.

    9 June 2018 - Hari Enam ba Minggu Kesembilan Musim Selama (Memorial of the Immaculate Heart of the Blessed Virgin Mary)

    Bacha Ke Satu:
    2 Timoti 4: 1 - 8

    Di mua Allah Taala enggau di mua Jesus Kristus ke deka ngakim orang ke idup enggau orang ke mati, enggau ketegal Iya deka datai baru, enggau ketegal Perintah Iya, aku ngasuh nuan nusui Jaku nya, lalu majak nusui Jaku nya, nemuka maya nya ngena tauka enda; nguingka ati orang, ngerara, enggau meransang orang, ngena pengabis pengeliat ati nuan lebuh nuan ngajar.

    Laban maya deka datai alai orang enggai mendingka ajar ti ngena, tang ingin deka ngempuruka bala pengajar ke deka nyebut utai ti dikerinduka sida, lalu sida deka limpang ari ajar ti bendar lalu mendingka cherita kelulu.

    Tang nuan enda tau enda seruran tegap dalam semua utai, tan natka pemerinsa, bekereja nyadi penginjil, lalu ngereja semua pengawa nuan.

    Ba pasal aku empu, aku udah dituang baka genselan, lalu aku nyau deka ninggalka dunya tu.

    Aku udah bebendar belaban. Aku udah datai ba adan, lalu aku agi mengkang bepegai ba pengarap.

    Berengkah ari diatu, makota pengelurus udah ditaruh ke aku, ti deka diberi Tuhan, Hakim ti Lurus, ngagai aku lebuh Hari nya ila, lalu ukai semina ngagai aku aja, tang mega ngagai semua orang ke lelengau deka meda Iya pegari.

    Masmur Entara:
    Masmur 71: 8 - 9, 14 - 15AB, 16 - 17

    Saut (peda 15ab): Aku deka belaguka pasal pengelepas Nuan.

    Ke Satu
    Aku muji Nuan sepemanjai hari,
    lalu madahka mulia Nuan.
    Anang nulak aku ketegal aku nyau tuai.
    Anang ninggalka aku ketegal aku nyau lemi.

    Saut: Aku deka belaguka pasal pengelepas Nuan.

    Ke Dua
    Aku deka seruran manggaika pengandal ati aku ba Nuan.
    Aku deka bebendar agi muji Nuan.
    Aku deka nusui pasal pemadas Nuan.
    Aku deka bejakuka pasal pengelepas Nuan sepemanjai hari.

    Saut: Aku deka belaguka pasal pengelepas Nuan.

    Ke Tiga
    Aku deka bejalai ngena pengering TUHAN Allah Taala.
    Aku deka madahka pemadas Nuan siku aja.
    Nuan udah ngajar aku kenyau ari aku agi biak,
    lalu aku mengkang madahka pemadas pengawa Nuan.

    Saut: Aku deka belaguka pasal pengelepas Nuan.

    Ke Empat
    Aku endang amat deka muji Nuan ngena belikan.
    Aku deka muji penetap ati Nuan, O Allah Taala aku.
    Aku deka nebah belikan lalu belagu
    ke Nuan Allah Taala ti Kudus ke disembah orang Israel.

    Saut: Aku deka belaguka pasal pengelepas Nuan.

    Alleluia (peda Luke 2: 19)
    Alleluia, alleluia
    Beberekat meh Maria Dara Meruan Tuchi ti nyimpan semua jaku Allah Taala
    lalu belematika jaku nya dalam ati iya.
    Alleluia.

    Bacha Injil
    Luke 2: 41 - 51

    Nyadi genap taun apai indai Jesus mansang ngagai Jerusalem deka ngintu Gawai Paska.

    Lalu lebuh Jesus umur dua belas taun, sida mupuk ngagai Gawai nya baka selama.

    Tembu Gawai nya, lebuh sida mulaika diri, Nembiak nya, iya nya Jesus, ninggalka Diri di Jerusalem, tang apai indai Iya enda nemu nya.

    Seduai iya bejalai sehari nya ngumbai Iya bejalai enggau raban sida empu. Udah nya seduai iya lalu belabuh begigaka Iya ba bala kaban belayan enggau pangan sida.

    Lebuh seduai iya nadai tetemuka Iya, seduai iya lalu nikal ngagai Jerusalem, ngiga Iya.

    Tiga hari udah bekau nya, nya baru seduai iya tetemuka Iya dalam Rumah Sembiang, duduk enggau bala pengajar, mendingka sida, sereta betanyaka utai ngagai sida.

    Lalu semua orang ke ninga Iya balat alit ati ninga penalam penemu enggau saut Iya.

    Lebuh apai indai Iya meda Iya, seduai iya balat alit ati, lalu ku indai Iya bejaku enggau Iya, “Anak, nama kebuah Nuan miaka kami duai apai nuan baka tu? Peda Nuan, kami duai apai Nuan udah irau ati begigaka Nuan.”

    Iya lalu nyaut, “Nama kebuah seduai begigaka Aku? Kati seduai enda nemu Aku endang enda tau enda diau dalam rumah Apai Aku?”

    Tang seduai iya enda meretika utai ti disebut Iya ngagai seduai.

    Iya lalu mupuk enggau seduai iya lalu datai di Nasaret. Iya ngasika seduai iya, lalu indai Iya nyimpan semua utai nya dalam ati diri.

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: