#InjilSeharitu: Hari Lima, 8 June 2018 ba Minggu Kesembilan Musim Selama - Berita Iban Online

Header Ads

  • Baru Nyadi

    #InjilSeharitu: Hari Lima, 8 June 2018 ba Minggu Kesembilan Musim Selama

    Tang siku soldadu ngerejang rusuk Jesus ngena sangkuh. Tekala nya darah enggau ai lalu ensambur pansut.

    8 June 2018 - Hari Lima ba Minggu Kesembilan Musim Selama (Solemnity of Most Sacred Heart of Jesus).

    Bacha Ke Satu:
    Hosea 11: 1, 3 - 4, 8C - 9

    Ku TUHAN bejaku:
    Lebuh Israel agi mit, Aku rinduka iya lalu Aku ngangauka anak Aku pansut ari menua Ejip.

    Aku udah ngiring lalu ngajar orang Israel bejalai. Aku udah merap bala nembiak Aku tang sida enda ngaku Aku udah ngeraika sida.

    4 Aku nguluka sida enggau penelap sereta enggau pengerindu. Aku ngangkatka sida ngagai kuyu Aku. Aku ngenduk lalu nyapi sida.

    Ati Aku kelalu balat rinduka kita.

    Aku enggai ngukum kita lebuh Aku ringat. 

    Aku enggai agi ngerusak Israel, laban Aku tu Allah Taala, ukai mensia, Aku ti kudus, ke meruan enggau kita. Aku enggai datai ngagai kita lebuh Aku ringat.

    Masmur Entara:
    Isaiah 12: 2 - 3, 4, 5 - 6

    Saut (peda 3): Baka ai ti ngasuh orang ke aus gaga, baka nya meh bala nembiak Allah Taala deka rami gaga lebuh Iya ngelepaska sida.

    Ke Satu
    Allah Taala endang Juruselamat aku;
    Aku deka manggaika pengarap aku ba Iya lalu enda takut. 

    TUHAN meri aku kuasa enggau pengering.
    Iya endang Juruselamat aku.

    Baka ai ti ngasuh orang ke aus gaga,
    baka nya meh bala nembiak Allah Taala deka rami gaga lebuh Iya ngelepaska sida.

    Saut: Baka ai ti ngasuh orang ke aus gaga, baka nya meh bala nembiak Allah Taala deka rami gaga lebuh Iya ngelepaska sida.

    Ke Dua
    Beri terima kasih ngagai TUHAN!
    Kangauka Iya minta Iya nulung kita!
    Padahka ngagai semua bansa utai ti udah dikereja Iya!
    Padahka ngagai sida pasal pemesai kuasa Iya!

    Saut: Baka ai ti ngasuh orang ke aus gaga, baka nya meh bala nembiak Allah Taala deka rami gaga lebuh Iya ngelepaska sida.

    Ke Tiga
    Belagu muji TUHAN, ketegal utai ti besai ti udah dikereja Iya. 
    Awakka semua dunya ninga berita nya.
    Awakka semua orang ke diau di Sion manjung lalu belagu!
    Allah Taala ke disembah orang Israel ti kudus endang besai kuasa,
    lalu Iya diau enggau bala nembiak Iya.

    Saut: Baka ai ti ngasuh orang ke aus gaga, baka nya meh bala nembiak Allah Taala deka rami gaga lebuh Iya ngelepaska sida.

    Bacha Ke Dua:
    Epesus 3: 8 - 12, 14 - 19

    Menyadi:
    Taja pen aku tu orang ke pemadu mit ari semua nembiak Tuhan, pengasih tu udah diberi ngagai aku, iya nya nusui ngagai orang bansa bukai pasal pemesai pengaya Kristus, lalu mai semua bansa nemu misteri Iya ti dilalaika sejeman-jeman tu dalam Allah Taala ke ngaga semua utai;
    ngambika diatu, ulih eklisia, semua penemu-dalam Allah Taala dipadahka ngagai bala pemerintah, enggau kuasa ti di langit, nitihka juluk ati Iya ti meruan belama iya, ti udah dipejalaika Iya dalam Jesus Kristus Tuhan kitai. 

    Dalam Iya enggau ulih pengarap kitai ke Iya, kitai berani sereta kempang ati datai ngagai Allah Taala.

    Nya meh kebuah aku besugang di mua Apai, ke meri nama ngagai semua ruang bilik ti di serega enggau di dunya.
    Aku besampi ngambika, ari pemesai pengaya Iya ti bemulia, Iya ngeringka ati kita ngena kuasa ulih Roh Iya, sereta ngambika Kristus diau dalam ati kita, ulih pengarap, lebuh kita beurat sereta negapka diri dalam pengerindu. 

    Aku besampi ngambika kita, sama enggau semua nembiak Allah Taala, bisi kuasa kena nemu pemesai, pemanjai, peninggi enggau penalam pengerindu Kristus ti ngelui peragam mensia, ngambika kita dipenuhka enggau semua personaliti Allah Taala.

    Alleluia (peda Matthew 11: 29AB)
    Alleluia, alleluia
    Ambi lalu san tangkun Aku, ku TUHAN;
    lalu belajar ari Aku, laban Aku nelap sereta baruh ati.
    Alleluia.

    Tauka (1 John 4: 10B)
    Alleluia, alleluia
    Allah Taala udah rinduka kitai,
    lalu udah ngirumka Anak Iya nyadika piring kena muai dosa kitai.
    Alleluia.

    Bacha Injil
    John 19: 31 - 37

    Laban hari nya Hari Alai Nyendiaka Gawai, orang Judah enggai nejuka bangkai Jesus mengkang ba kayu regang lebuh hari Sabat (kelebih agi laban hari Sabat nya amat kudus). Nya alai sida lalu minta Pilate ngasuh orang matahka kaki orang ke diregang, ngambika bangkai sida tau diambi ari regang nya.

    Sida soldadu mansang lalu matahka kaki orang ke terubah, enggau kaki siku ti bukai ke diregang sama enggau Jesus.

    Tang lebuh sida datai ngagai Jesus, lalu meda Iya endang udah mati, sida enda matahka kaki Iya.

    Tang siku soldadu ngerejang rusuk Jesus ngena sangkuh. Tekala nya darah enggau ai lalu ensambur pansut.

    Siku orang ke meda nya, udah besaksika pasal utai nya, ngambika kita mega arap. Jaku saksi iya endang amat, lalu iya nemu diri endang madahka utai ti bendar.

    Utai tu nyadi ngambika Bup Kudus dikamatka, “Nadai siti tulang Iya dipatahka.”

    Siti agi genteran dalam Bup Kudus bisi mega nyebut, “Orang deka merening ngagai Iya ti udah direjang sida.”

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads