#InjilSeharitu: Hari Satu, 11 June 2018 ba Minggu Ke Sepuluh Musim Selama - Berita Iban Online

Header Ads

  • Baru Nyadi

    #InjilSeharitu: Hari Satu, 11 June 2018 ba Minggu Ke Sepuluh Musim Selama

    Lebuh Jesus meda bala orang mayuh, Iya niki ngagai bukit sigi, lalu lebuh Iya nudukka Diri, sida murid Iya lalu datai ngagai Iya.


    11 June 2018 - Hari Satu ba Minggu Ke Sepuluh Musim Selama (Memorial of Saint Barnabas, Apostle)

    Bacha Ke Satu:

    Surat Pasal Kereja Rasul 11: 21B - 26; 13: 1 - 3

    Lebuh maya nya, mayuh orang arap lalu nguingka diri ngagai Tuhan.

    Berita pasal tu bisi didinga eklisia di Jerusalem. Sida lalu ngasuh Barnabas ke Antiok.

    Lebuh iya datai di Antiok, lalu meda berekat Allah Taala, iya gaga amat ati, lalu iya meransang semua sida meruan tetap ati ngagai Tuhan enggau pengabis ati sida, laban iya orang ke manah, ke penuh laban Roh Kudus enggau pengarap. Mayuh amat orang dibai ngagai Tuhan.

    Udah nya Barnabas mupuk ngagai Tarsus, ngiga Saul.

    Lebuh iya udah tetemuka Saul, iya lalu mai Saul ngagai Antiok. Seduai iya betemu enggau raban eklisia, sereta ngajar mayuh orang setaun penuh. Antiok nya meh endur alai bala murid terubah dikumbai Kristian.

    Nyadi eklisia di Antiok bisi nabi enggau pengajar: Barnabas, Simeon ke dikumbai Niger, Lusius ari Sairin, Manain ke pangan Herod,  enggau Saul.

    Lebuh sida benung nyembah Tuhan sereta bepasa, Roh Kudus bejaku ngagai sida, “Pilih ke Aku Barnabas seduai Saul ke udah dikangauka Aku ngereja pengawa ti diasuh Aku kereja seduai iya.”

    Lebuh sida udah bepasa sereta besampi, sida lalu ngengkahka jari sida atas seduai iya, lalu ngasuh seduai iya mupuk.

    Masmur Entara:

    Masmur 98: 1, 2 - 3AB, 3CD - 4, 5 - 6

    Saut (peda 2b): TUHAN udah ngasuh semua bansa nemu kuasa Iya ti ngelepas.

    Ke Satu
    Nyanyi pantun ti baru ke TUHAN.

    Iya udah ngereja utai ti badas!

    Ngena kuasa Iya enggau pengering Iya ti kudus

    Iya udah bulih pemenang.

    Saut: TUHAN udah ngasuh semua bansa nemu kuasa Iya ti ngelepas.

    Ke Dua
    TUHAN madahka pemenang Iya.
    Iya ngasuh semua bansa nemu kuasa Iya ti ngelepas.

    Iya ngamatka semaya Iya ngagai orang Israel

    ngena ati ti tetap enggau pengerindu ti meruan belama iya.

    Saut: TUHAN udah ngasuh semua bansa nemu kuasa Iya ti ngelepas.

    Ke Tiga
    Semua bansa di semua endur
    udah meda pemenang Allah Taala kami.

    Belagu gaga ati ke TUHAN, semua kita dunya.

    Puji Iya ngena pantun enggau panjung gaga ati!

    Saut: TUHAN udah ngasuh semua bansa nemu kuasa Iya ti ngelepas.

    Ke Empat
    Belagu muji TUHAN! Tebah musik ngena belikan!

    Sepu terumpit enggau tanduk
    lalu manjung gaga ati ke TUHAN ti Raja kitai.

    Saut: TUHAN udah ngasuh semua bansa nemu kuasa Iya ti ngelepas.

    Alleluia (peda Matthew 5: 12A)

    Alleluia, alleluia
    Lantang sereta gaga meh kita,
    laban upah ti besai udah disedia ke kita di serega.
    Alleluia.

    Bacha Injil

    Matthew 5: 1 - 12

    Lebuh Jesus meda bala orang mayuh, Iya niki ngagai bukit sigi, lalu lebuh Iya nudukka Diri, sida murid Iya lalu datai ngagai Iya.

    Iya lalu belabuh ngajar sida, ku Iya:

    “Beberekat meh orang ke seranta dalam roh, laban Perintah serega endang enggi sida.

    Beberekat meh orang ke ngulit, laban sida deka diperindang.

    Beberekat meh orang ke baruh ati, laban sida deka bempu dunya.

    Beberekat meh orang ke lapar sereta auska pengelurus, laban Allah Taala deka ngemuaska sida.

    Beberekat meh orang ke kasihka orang, laban sida deka nerima pengasih.

    Beberekat meh orang ke tuchi ati, laban sida deka meda Allah Taala.

    Beberekat meh orang ke bekereja ke pemaik, laban sida deka dikumbai anak Allah Taala.

    Beberekat meh orang ke kena perinsa ketegal pengelurus, laban sida deka bempu Perintah serega.

    Beberekat meh kita lebuh orang mechat kita lalu merinsaka kita, lalu nyebut semua macham utai ti bula ngelaban kita ketegal Aku.

    Lantang sereta gaga meh kita, laban upah ti besai udah disedia ke kita di serega, laban nya mega chara orang merinsaka sida nabi ke dulu ari kita.”

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads