#InjilSeharitu: Hari Tiga, 13June 2018 ba Minggu Ke Sepuluh Musim Selama - Berita Iban Online

Header Ads

  • Baru Nyadi

    #InjilSeharitu: Hari Tiga, 13June 2018 ba Minggu Ke Sepuluh Musim Selama

    Ku Jesus bejaku ngagai bala murid Iya:
    “Anang ngumbai Aku datai deka muai Adat, tauka muai ajar sida nabi. Aku ukai datai deka muai Adat, tang deka ngamatka iya.

    13 June 2018 - Hari Tiga ba Minggu Ke Sepuluh Musim Selama (Memorial of Saint Anthony of Padua, Priest and Doctor of the Church)

    Bacha Ke Satu:

    1 Raja 18: 20 - 39

    Ahap lalu mesanka semua orang Israel enggau bala nabi Baal, ngasuh sida begempuru ba Bukit Karmel.

    Elijah lalu mansang ngagai orang mayuh, lalu bejaku, “Ni pengelama baru kita deka ngaga pemutus penemu kita? Enti TUHAN nya Allah Taala, sembah meh Iya. Tang enti Baal nya Allah Taala, sembah meh iya!” Tang orang mayuh enda nyaut.

    Udah nya Elijah bejaku, “Semina aku aja nabi TUHAN ti agi tinggal, tang Baal bisi 450 iku nabi.

    Bai dua iku sapi ti lelaki. Awakka bala nabi Baal ngambi siku sapi, munuh iya, netak iya, lalu manggaika iya ba atas kayu, tang anang nyelup kayu nya. Aku deka ngereja baka nya ke sapi siku.

    Udah nya awakka bala nabi Baal besampi ngagai petara sida, lalu aku deka besampi ngagai TUHAN. Iya ke nyaut ngena api, nya meh Allah Taala.” Orang mayuh manjung madahka sida besetuju.

    Udah nya Elijah bejaku enggau bala nabi Baal, “Laban kita mayuh tubuh, awakka kita meh dulu ngambi siku sapi ti lelaki, lalu nyendiaka iya. Awakka kita besampi ngagai petara kita, tang anang nyelup kayu nya ngena api.”

    Sida lalu ngambi sapi ti lelaki ti udah dibai ngagai sida, nyendiaka sapi nya, lalu besampi ngagai Baal nyentuk ngagai tengah hari. Ku sida ngangau enggau nyawa ti inggar, “Saut kami, Baal!” Sida majak betanda ngelingi alta ti udah digaga sida. Tang Baal nadai nyaut sida.

    Ba urung tengah hari, Elijah lalu belabuh ngeleseka sida. “Besampi inggar agi! Iya petara, ukai enda? Kada enda iya benung bemimpi, tauka bira, tauka udah bejalai ngagai menua bukai! Enti iya tinduk, gerak iya!”

    Bala nabi Baal lalu besampi inggar agi, lalu ngurik tubuh diri ngena duku enggau lungga, nitihka adat sida besembah, datai ke darah nyau nelusur tubuh sida.

    Sida majak rauh-rauh besampi nyentuk ngagai ngalih hari. Tang nadai ga Baal nyaut sida. Siti pen nadai meh saut didinga.

    Udah nya Elijah lalu bejaku ngagai orang mayuh, “Datai semak kitu ke agi ngagai aku.” Semua sida lalu begempuru ngelingi iya. Iya lalu belabuh ngaduka alta TUHAN ti udah runtuh.

    Iya ngambi dua belas igi batu, sigi ke genap raban bansa orang Israel ti ngangkatka nama bala anak lelaki Jakop. Jakop udah diberi TUHAN nama Israel.

    Iya lalu ngena batu nya ngaduka alta alai nyembah TUHAN. Iya ngeruang parit ngelingi alta nya. Parit nya ulih ngundan kira 15 liter ai.

    Udah nya iya nusun kayu ba alta nya, netak sapi ti lelaki nya, lalu manggaika lampang sapi nya ba atas kayu nya. Ku iya, “Isi penuhka empat igi tepayan enggau ai, lalu tuang ai nya ba piring enggau ba kayu tu.”

    Sida lalu ngereja nitihka asuh iya,
    lalu ku Elijah, “Beri mayuh agi ai.” Sida lalu nurutka jaku iya. “Kereja nya sekali agi,” ku iya bejaku. Sida lalu nurutka jaku iya baru.
    Ai nya nyau lilih ari alta nya, lalu ngemenuhka parit ti ngelingi alta nya.

    Ba urung ngalih hari, endang maya ngenjuk piring, nabi Elijah mansang ngagai alta, lalu besampi.

    Ku iya, “O TUHAN Allah Taala ke disembah Abraham, Isak enggau Jakop, beri tanda kena mandangka Nuan endang amat Allah Taala ke disembah orang Israel, lalu aku tu endang amat nembiak Nuan, ti udah ngereja semua utai tu nitihka pesan Nuan.

    Saut aku, TUHAN, saut aku, ngambika orang tu nemu Nuan endang TUHAN Allah Taala, lalu Nuan deka mai sida pulai baru ngagai Nuan.”

    TUHAN lalu ngasuh api nurun ari langit. Api nya lalu nganguska piring, kayu, enggau batu nya, ngasuh tanah dia angat, lalu ngerangkaika ai ti dalam parit nya.

    Lebuh orang mayuh meda nya, sida lalu nyungkurka diri ke tanah, lalu bejaku enggau nyawa ti inggar, “TUHAN meh Allah Taala. Semina TUHAN siku aja ti Allah Taala!”

    Masmur Entara:

    Masmur 16: 1 - 2AB, 4, 5AB & 8, 11

    Saut (peda 1): Jaga aku, O Allah Taala; laban Nuan endang pengadang aku.

    Ke Satu
    Jaga aku, O Allah Taala. Aku ngarapka Nuan meri aku pengelikun.
    Aku nyebut ngagai TUHAN, “Nuan TUHAN aku.”

    Saut: Jaga aku, O Allah Taala; laban Nuan endang pengadang aku.

    Ke Dua
    Orang ke nyembah petara bukai,
    deka ditinggang mayuh macham penusah.
    Aku enggai enggau sida ngenjuk piring.
    Aku enggai nyembah petara sida.

    Saut: Jaga aku, O Allah Taala; laban Nuan endang pengadang aku.

    Ke Tiga
    Semina Nuan aja, TUHAN, ke dikemisi aku
    lalu Nuan meri aku semua utai ti dipeguna aku.
    Aku seruran nemu TUHAN bisi enggau aku.
    Iya semak aku, lalu nadai utai ulih ngelebuka aku.

    Saut: Jaga aku, O Allah Taala; laban Nuan endang pengadang aku.

    Ke Empat
    Nuan nunjukka ngagai aku jalai ti nuju ngagai pengidup.
    Ati aku gaga laban Nuan bisi enggau aku
    lalu ati aku lantang belama iya.

    Saut: Jaga aku, O Allah Taala; laban Nuan endang pengadang aku.

    Alleluia (peda Masmur 25: 4A, 5A)

    Alleluia, alleluia
    Ajar aku jalai Nuan, O Allah Taala aku,
    lalu iring aku nitihka pemendar Nuan.
    Alleluia.

    Bacha Injil

    Matthew 5: 17 - 19

    Ku Jesus bejaku ngagai bala murid Iya:
    “Anang ngumbai Aku datai deka muai Adat, tauka muai ajar sida nabi. Aku ukai datai deka muai Adat, tang deka ngamatka iya.

    Laban, enggau bendar Aku madah ngagai kita, sebedau langit enggau dunya lesap, nadai leka jaku tauka titik ti pemadu mit deka lenyau ari Adat, sebedau semua utai dikamatka.

    Nya alai, barang sapa ngelanggar pesan ti pemadu mit tu, lalu ngajar orang ngelanggar iya, deka dikumbai pemadu mit dalam Perintah serega, tang barang sapa ngasika pesan, lalu ngajar orang ngasika iya, deka dikumbai besai dalam Perintah serega.”

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads