Kembuan ati ti lurus, ku Masing - Berita Iban Online

Header Ads

  • Baru Nyadi

    Kembuan ati ti lurus, ku Masing

    Presiden Parti Rakyat Sarawak (PRS) Tan Sri James Masing.

    KUCHING: Presiden Parti Rakyat Sarawak (PRS) Tan Sri James Masing ngansak semua kaban dalam gempung empat parti ti numbuhka Gabungan Parti Sarawak (GPS) bela ngembuan ati ke lurus enggau pangan diri.

    Ku iya, pengawa bepilih ke udah meri teladan ngagai semua ke alai gempung Barisan Nasional (BN) udah balat alah nyengkaum BN di Sarawak ke alah ba sekeda sitak parlimen.

    “Ungkup PRS, kitai alah di Selangau, Lubok Antu enggau Julau. Kitai udah bebendar ngereja pengawa ke patut tang sida ke disatup bendar agi ari kitai.

    “Dalam gempung, kitai (PRS) mega udah bebendar tang sekeda kaling dalam gempung ke sama enda lurus ngereja pengawa.

    “Ari pansik aku ba kandang endur kitai alah, aku nemu sekeda kaling kitai enda ngembuan ati ke lurus deka mantu,” ku iya.

    Masing mansutka jaku nya ba Pengerami Ngiling Tikai ke diatur di sebuah restoran ditu, malam ensanus.

    Iya ke mega Sapit Kepala Menteri nambah, ba pengawa bepilih ke udah, ukai semina PRS aja ke alah tang semua ke dalam gempung BN alah magang.

    “Pengudah pengawa bepilih, PRS lenyau siti pangku pengawa menteri penuh enggau siti pangku pengawa sapit menteri, Parti Sa’Ati Rakyat Sarawak (SUPP) lenyau siti penuduk menteri penuh, Parti Progresif Demokratik (PDP) mega lenyau siti pangku pengawa sapit menteri.

    “Parti Pesaka Bumiputera Bersatu (PBB) ke mayuh agi alah ke alai sida lenyau 5 pangku pengawa menteri penuh enggau 2 sapit menteri,” ku Masing.

    Berindik enggau nya iya ngansak semua kaban dalam gempung berakup dikena napi pengawa bepilih nengeri ti deka datai ba taun 2021.

    Ku iya, semua kitai maya pengawa bepilih ngena siti aja lalu semua barang disimpan dalam perau nya.

    “Enti maya bekayuh kitai meseti segulai, maya nanjak wong meseti mega segulai.

    “Ba pengawa bepilih ke udah, enda tentu berapa peda aku. Bisi sekeda nya ngayuh perau, bisi ke nimba lalu bisi ngaga lubang ba perau nya.

    “Ketegal nya, maya nanjak wong perau deka karam. Enti karam ukai semina orang bekayuh aja ke nyau, semua barang pan nyau.

    Beteladanka pekara nya, Masing madah maya bekayuh anang betundi, betichik sereta bepalu pangan diri.

    Enti nadai mayuh macham maya nanjak wong ku iya, semua deka selamat lalu pia mega barang ke dibai.

    “Diatu sapa rugi, ukai kitai PRS aja rugi, semua kitai ke bekayuh rugi magang laban perau udah karam lalu barang abis lenyau,” ku iya nandu.

    Pengerami malam nya digulu semua kunsil besai, kaban sereta penyukung parti.

    Bela datai Sekretari Besai PRS Datuk Joseph Salang, Ketuai Bagi Nembiak enggau Orang Indu Datuk Snowdan Lawan sereta Dato Sri Doris Brodie enggau orang bukai. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads