Kena duit galau dikena ngaga perengkaguna ke rayat - Berita Iban Online

Header Ads

  • Baru Nyadi

    Kena duit galau dikena ngaga perengkaguna ke rayat

    Sapit Kepala Menteri Tan Sri Datuk Amar Dr James Jemut Masing.

    KUCHING: Perintah Sarawak meseti melanjaka duit galau dikena ngaga perengkaguna dalam timpuh tiga taun tu, ku Sapit Kepala Menteri Tan Sri Datuk Amar Dr James Jemut Masing.

    Ku iya, enti galau nya enda dipelanja ba pekara pemansang ungkup pemaik rayat, gempung parti dalam perintah nengeri tau alah ba Pengawa Bepilih Nengeri Ke-12 (PRN12) taun 2021.

    “Kitai bisi duit galau ba penyampau RM31 bilion, enti duit tu enda dikena ba atur ngemansang Sarawak, kitai engka alah ba pengawa bepilih 2021.

    “Perintah ke ngambi kuasa ari kitai deka melanja duit nya dikena nyendia perengkaguna baka ngaga jalai alun, nyendia bekal lekterik enggau ai sereta pemansang bukai.

    “Pekara nya deka ngayanka sida manah agi ari kitai tajapan kitai ke udah ngulihka duit galau nya,” ku Masing.

    Iya mansutka jaku nya ba Pengerami Ngiling Tikai Parti Rakyat Sarawak (PRS) ke diatur di sebuah restoran ditu, malam ensanus.

    Masing ke mega Presiden PRS madah duit galau nya patut dikena enggau manah lalu dipelanja ba projek ti meri empas ke manah ngagai semua rayat kelebih agi di menua pesisir ke alai undi rayat datai ari menua pesisir.

    Beambika chunto jalai tebing tasik, Masing madah jalai ari Sematan ke Miri ba penyauh 900 km nya begunaka 5 iti jematan.

    Ku iya, siti agi jalai ba penyauh 200 km ari Kota Samarahan ngelayang Sungai Batang Lupar terus ke Roban lalu ke Sibu.

    “Kelimpah ari nya kitai bisi jalai ari Sebuyau ke deka mudik ke Lingga lalu ke Sri Aman sereta deka mega  meraka Sungai Batang Lupar lalu terus ke Betong.

    “Projek tu begunaka belanja RM6 bilion lalu udah tentu deka mai penguntung ngagai rayat Sarawak,” ku iya.

    Masing madah perintah nengeri meseti nguna duit galau nya dikena nembuka projek jalai pesisir ketegal ke diatu Sara-wak semina bisi jalai Pan Borneo ke mega benung digaga.

    Iya nambah, penyakal enggai meda perintah nengeri melanja duit nya ba pekara pemansang ketegal tau ngujungka sida nadai chara bejaika perintah agi.

    “Enti kitai enggai ngaga semua tu, penyakal deka bisi peluang bejaika kitai.

    “Kitai bisi duit, kitai mega bisi pengelandik lalu kitai meseti begempung. Kena duit galau tu ba atur nyendia perengkaguna ke patut di menua pesisir.

    “Nadai kebuah kitai alah bepilih ba taun 2021 enti kitai udah mantu rayat ti begunaka bantu. Kitai ngaga jalai alun, nyendia bekal lekterik enggau ai beresi,” ku Masing. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads