Header Ads

  • Berita Tebaru

    Kunteriktor meseti nentuka nadai projek ti betangguh

    Kaban Kaunsil Nengeri (ADUN) Senadin Datuk Lee Kim Shin

    MIRI: Raban kunteriktor ti betapi enggau penanggul sereta bemacham penekul maya bejalaika projek berumah di sesebuah kandang menua kelebih agi ti sekut enggau genturung pendiau, patut madah penanggul sida ngagai raban Kaunsil Kandang Menua (PBT) ngambika dirandau dikena nyeliahka projek nya betangguh.

    Seraya nangkan raban kunteriktor ti dilempaika pengawa ngaga projek parit di genturung Kampung Pujut Tanjong Batu ditu, ku Kaban Kaunsil Nengeri (ADUN) Senadin Datuk Lee Kim Shin, enti kunteriktor terus berandau enggau sekeda raban nadai nengah PBT baka Majlis Bandaraya Miri (MBM) ti ngemendarka tinda projek ngagai sida, pekara tu tentu mar agi lalu begunaka timpuh ti lama.

    Kebuah pia ku iya, baka selama projek berumah di kandang ti sekut kelebih agi ngaul kandang genturung pendiau, isu sambung utiliti baruh tanah baka sambung ai, gis, tali telekomunikasyen tauka tiang elektrik deka seruran nyadi penekul ngagai sesebengkah projek.

    “Pekara baka tu patut dipadah ngagai raban kaunsil (MBM) ngambika dirandau, nentuka MBM ulih ngangauka ejensi nyediaka utiliti bekaul baum lalu ngiga jalai mutarka iya.

    “Enti enda, projek kita deka terus betangguh lalu kita deka nanggung ungkus operasyen ti nambah kelimpah nanggul enggau ngerugi rayat ti nganti perengka guna projek berumah kita tembu,” ku iya.

    Jaku tegur Lee nya dipansutka iya lebuh ngabas projek ngaga sistem parut di genturung Kampung Pujut Padang Kerbau ditu, kemari, ti belan belanja sepenyampau RM1.6 juta (tinda pemadu baruh diberi) lalu nyadi siti ari projek parit pemadu besai ditu, kandang diatu.

    Projek ngaga parit semin sepanjai lebih tiga kilometer ngelingi genturung pendiau nya, di tengah mengeri, kelimpah ngaga parit pemadu besai (dikena nimbun ujan) sepanjai 137 meter enggau dua buah pagar nekat bah di ujung parit ti nyambung ngagai parit besai ba jalai besai.

    Projek ti patut tembu dalam empat bulan lalu tembu dalam bulan tu, semina mungkur 63 peratus aja udah digaga ketegal napi beberapa penekul ti ngaul pejalai sambung gis, ai enggau tali karan sereta paip bomba.

    Nya alai Lee ngerah raban kunteriktor berandau enggau MBM ngambika baum begulai enggau raban nyediaka utiliti bekaul baka raban LAKU Management (ungkup sambung ai), SESCO (tali karan) Sarawak GAS (ungkup sambung gis) enggau Opis Bomba enggau Penyah Penusah Zon Miri (ungkup sambung paip bomba).

    “Berandau enggau raban ti nyedia mutarka pekara tu memanah, udah nya tetapka hari bulan ngambika pejalai perengka guna tu dipindah, nitihka pematut, ngambika projek ulih digaga, enti enda, projek tu mekang tejanggal, taja kitai (perintah) dekaka projek tu tembu.

    “Enti ulih dalam bulan tu laban diatu musim kemarau, tu deka ngemuntangka pengawa ngaga parit semin lalu datai ba musim landas ila, parit tu udah ulih dikena nyeliahka bah ti nyadi di genturung pendiau tu enggau kandang ngelingi,” ku Lee.

    Penanggul parut di genturung pendiau nya sebedau tu ukai semina udah ngasuh bah tunggal nyadi dia tang mega ngaul kandang besemak nyengkaum lupak pejalai di jalai besai, Jalai Miri-Pujut ti suah betapi enggau bah tunggal ketegal penanggul parut, maya ujan bangat.

    Lee, udah nya bisi mega ngabas taba ngaga projek parit nya sereta genturung pendiau ti betapi enggau penekul sereta penanggul, nitih ku Lee, patut dirikot lalu dibai ngagai komuniti begulai enggau raban MBM sereta ejensi nyediaka utiliti bekaul.

    Sama bisi nyempulang Lee ngabas projek iya nya Sekretari MBM, Morshidi Frederick; injinir MBM, Ir. Chai Ko Het; Ketuai Raban Bansa Kampung Pujut Tanjong Batu, Usman Suleiman sereta pengari raban kunteriktor Bersama Jaya Construction Sdn. Bhd. #UtusanBorneo

    No comments

    Post Top Ad