Header Ads

  • Berita Tebaru

    Langgur penemu dipansutka Masing enda masuk akal

    LOGO: Parti Rakyat Bersatu (UPP)

    KUCHING: Rizab Sarawak ukai wang turu pilih ke patut dikena nentuka parti politik bekuasa ba pengawa bepilih, tang patut dijaga ke guna rebak dudi.

    Sentral Sekretariat Parti Rakyat Bersatu (UPP) nengah penerang ngarapka perintah nengeri ti diiring Kepala Menteri Datuk Patinggi Abang Johari Tun Openg enda nerima perambu melanja rizab Sarawak dikena ngemansangka infrastruktur dalam timpuh tiga taun tu.

    Laban ke patut rizab nengeri dijaga Perintah Gabungan Parti Sarawak (GPS), ku UPP nya seraya bepenemu penerang ke dipansutka Sapit Kepala Menteri ti mega Menteri Pemansang Infrastruktur enggau Perengka Pengangkut, Tan Sri Datuk Amar James Jemut Masing nya penerang ke nadai tanggungpengawa.

    “Enggau penuh basa ngagai Masing, perambu nya enda masuk akal sereta enda patut (diperambu) enda ngira pemesai nengeri, kelebih agi siku Sapit Kepala Menteri.

    “Rizab nengeri kitai iya nya tabung ke digaga pengelama beberapa puluh taun ke udah sereta digalau dikena nentuka pengelikun belanja ungkup rebak dudi kitai.

    “Rizab tu enggi rayat Sarawak. Nya ukai enggi GPS tauka enda ngira bagi parti politik,” ku Sentral Sekretariat UPP  nengah penerang berita, kemari.

    Sentral Sekretariat UPP meri penerang nimbal penerang Sapit Kepala Menteri Tan Sri Datuk Amar James Jemut Masing dalam surat berita kemari madahka Perintah Sarawak meseti melanja rizab Sarawak dikena ngemansangka infrastruktur dalam timpuh tiga taun tu.

    “Rizab ukai wang turu pilih dikena nentuka GPS deka bekuasa dalam pengawa bepiliih nengeri ke deka datai.

    “Enda ngira bagi kaban politik sekalika ari GPS tauka Pakatan Harapan (PH) tauka Barisan Nasional (BN) ti nganggap iya ulih ngabiska (belanja) pengidup anak kitai jemah ngasuh diri alah ba pengawa bepilih ke deka datai,” ku Sentral Sekretariat Parti Rakyat Bersatu (UPP).

    Nambahka nya, UPP nya madahka perintah patut berundingka perambu ti baka nya ke deka melanja semua rizab nengeri sebedau pengawa bepilih ke deka datai, tikas wang menua kitai ba komuniti antarabansa ulih jai.

    “Kami minta Kepala Menteri ngambika nulak perambu Masing sereta madahka rizab nengeri deka dijaga sereta diibun perintah GPS,” ku UPP nya.

    Bepelasarka penerang dalam surat berita kemari, nitihku Masing, enti rizab nya enda dibelanja ke tuju pemansang ke pemanah rayat, parti politik ke ditumbuhka Perintah Sarawak diatu ulih alah ba Pengawa Bepilih Nengeri Ke-12 dalam taun 2021.

    “Kitai (Sarawak) bisi duit rizab sepenyampau RM31 bilion, enti duit nya enda dikena ungkup pemansang Sarawak, kitai engka alah ba pengawa bepilih taun 2021,” ku Masing. #UtusanBorneo 

    No comments

    Post Top Ad