Masing sedia nerima langgur penemu bukai - Berita Iban Online

Header Ads

  • Baru Nyadi

    Masing sedia nerima langgur penemu bukai

    Presiden Parti Rakyat Sarawak (PRS) Tan Sr James Jemut Masing.

    KUCHING: Presiden Parti Rakyat Sarawak (PRS) Tan Sr James Jemut Masing madahka iya sedia nerima perambu ti manah agi ari perambu iya ti deka numbuhka Gabungan Parti Sarawak (GPS) siti parti pupu bansa.

    Ku iya, perambu iya deka numbuhka siti parti pupu bansa nadai niat tauka agenda dilalai, tang nentuka GPS tauka sebarang tempa ila, terus megai atur pengawa Sarawak pengudah Pengawa Bepilih Nengeri (PRN) 2021.

    “Enti perambu aku nya dipeda enda engkeman, aram kitai ngiga ti manah agi. Nyadi raban bisi pemerat (dalam GPS), aku sedia dikemetul.

    “Anang kitai charut tauka mejal sebarang raban di luar GPS nyadi siti gempung,” ku iya.

    Masing ke lalu nyadi Sapit Kepala Menteri madah, Sarawak ngembuan mayuh ketuai biak ti bepenau mangku pengawa nyadi ketuai nengeri pengudah Kepala Menteri Datuk Patinggi Abang Johari Tun Openg.

    “Aku udah nyadi pengari rayat, ti dipilih rayat kenyau ari taun 1983, 35 taun udah, (timpuh ti) lebih ari chukup ba aku.

    “Aku udah naka ulih gawa nempa Sarawak menyana agi, aku besampika pekara pemadu manah ngagai bala ketuai ti biak tu,” ku iya.

    Menteri Pemansang Infrastruktur enggau Perengka Pengangkut nya mansutka jaku nya nimbal beberapa penemu dibantaika beberapa raban datai ari penganalisis politik sereta Mandal Presiden Parti Pesaka Bumiputera Bersatu (PBB) Datuk Abdul Karim Rahman Hamzah.

    Sida nya mega nanya pasal empat penetap diletak PRS ngambi numbuka GPS ti datai ari PRS, PBB, SUPP enggau PDP siti parti politik pupu bansa kelebih agi nadai penguasa parti politik ti besai agi nguasa parti ti mit agi.

    Ba Penganalisis Politik ari Universiti Malaysia Sarawak (UNIMAS) Prof. Madya Dr Jeniri Amir, penemu numbuhka siti parti ungkup pupu bansa iya nya enda realistik diatu.

    Ku iya, GPS empu endang siti pelasar ungkup pupu bansa kelebih agi PBB.

    Berebak enggau nya, Abdul Karim madahka PRS enda ulih nentuka struktur enggau penumbuh GPS laban diatu apin ‘genap’.

    “GPS pen bedau direjista enggau Opis Pengerejista Gerempung (ROS). Nama kebuah nguna media mantaika enggau penetap?.

    “Pekara tu patut dikerandau begulai antara ‘kaban’ ti bisi ati nyadi sebagi ari gempung tu.

    Abdul Karim mega madahka enti PRS ngasaika nyadi sebagi ari GPS kelalu nating sida enggau chara ti manah milih ngambika enda nyadi kaban gempung nya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads