Header Ads

  • Berita Tebaru

    Nama Chong nadai disengkaum dalam rintai kabinet baru Pakatan Harapan

    ENDA NEMU NYAUT TANYA BERITA KE ENDA AMAT: Chong (tiga kanan) disempulang ulih Dr Yii (dua kanan) enggau Aziz (kiba). Sama bisi dalam gambar, tiga iku sida bukai, iya nya orang ke bekunsi ngempu Ocean Beach Resort, ke bempu pala tanah Lut 176 Gading-Lundu Land District deka abis timpuh kena 13 Disember 2024 tang peminta sida deka ngemaruka lisin nya enda diterima ulih Opis Tanah enggau Survei.

    KUCHING: Chairman Pakatan Harapan (PH) Menua Sarawak, Chong Chieng Jen kemari madahka iya enda tentu ibuhka berita portal ke mantaika rintai kabinet baru baruh Perintah PH, madahka iya enggai nyaut tanya nyerumba tanya ke diperundingka tang nyangka ukai berita ke amat.

    “Tanya kita ‘The Malaysian Insight’ (enti berita nya amat tauka bula)...Kita enda ulih nanya aku enti berita nya amat tauka enda. Aku ukai pengarang berita ‘The Malaysian Insight’, lalu ukai mega orang ke bempu taruh dia,” ku iya madah ba aum pengarang berita di Indu Opis Parti Tindakan Demokratik (DAP) ditu, kemari.

    Aum pengarang berita nya bela digulu ulih Kaban Parlimen (MP) Bandar Kuching enggau Pemantu Khas Chong, Abdul Aziz Isa.

    Portal berita, ke madahka bisi orang ke tau dikarap mantaika berita tu madahka lis nama 26 kaban kabinet Menteri Besai, Tun Dr Mahathir Mohamad udah dituduh sida iya.

    Lalu lis nya nyengkaum Ketuai Parti Keadilan Rakyat (PKR) Sarawak ti mega nyadi MP Selangau, Baru Bian dituduh nyadi Menteri Kereja tang nama Chong nadai disengkaum dalam lis nya.

    “Sebarang pengawa nuduh pangku pengawa nyadi menteri, kita tau nanya Menteri Besai laban nya kuasa iya, lalu pemadah deka digaga nitihka timpuh jam ke patut,” ku Chong, ti mega nyadi MP Stampin sereta Kaban Kunsil Nengeri (ADUN) Kota Sentosa.

    Chong lebuh ditanya enti iya bisi nerima surat bekait enggau tuduh pangku pengawa nyadi menteri dalam kabinet, ku Chong, iya bedau nerima sebarang surat panggil nya.

    “Aku bedau nerima sebarang surat, tang bekait enggau pangku pengawa ukai ‘ulu lungga’ aku udah nerima surat nya tauka bedau.

    “Nya tanya ke diperundingka tang nyangka ukai berita ke amat, lalu kami enda nyaut tanya ke enda terang... Pemadah nya deka digaga ulih Menteri Besai nitihka maya ke ditetapka ila,” ku iya. 

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: