Nanta enda nemu batang randau KM enggau PM - Berita Iban Online

Header Ads

  • Baru Nyadi

    Nanta enda nemu batang randau KM enggau PM

    Sekretari Besai Parti Pesaka Bumiputera Bersatu (PBB) Datuk Alexander Nanta Linggi.

    KUCHING: Sekretari Besai Parti Pesaka Bumiputera Bersatu (PBB) Datuk Alexander Nanta Linggi madahka naka diatu iya nadai nerima sebarang penerang ke dikerandau entara Kepala Menteri (KM) Datuk Patinggi Abang Johari enggau Menteri Besai (PM) Tun Dr Mahathir Mohamad.

    “Nyentukka diatu aku enda nemu nama pekara ke dikerandau sida laban aku bedau betemu enggau Kepala Menteri, kenyau iya udah betemu enggau Menteri Besai sereta enggau sida ke bukai.

    “Naka ke diatu aku nadai nerima pasal penerang ti dikerandauka sida,” ku Kaban Parlimen Kapit lebuh dikerandau Utusan Borneo seraya madahka diri enda nemu pengamat berita ke ditulis portal berita ti madahka PBB narit diri ari Barisan Nasional (BN).

    Nanta mansutka penemu iya lebuh dipinta meri penerang bekaul enggau berita portal The Malaydian Insight ti madahka PBB deka narit diri ari BN.

    Bepelasarka berita nya, Chairman BN Sarawak ti mega Presiden PBB Datuk Patinggi Abang Johari Tun Openg madahka PBB deka alah maya pengawa bepilih nengeri 2021 ila, enti enda narit diri ari BN ke mayuh makai suap.

    Nitihka berita portal nya Abang Johari meri penerang nya lebuh ke betemu enggau  Pemangku Chairman komponen Datuk Seri Dr Ahmad Zahid Hamidi, pengudah betemu enggau Menteri Besai Tun Dr Mahathir Mohamad di Putrajaya.

    “Pasal Kepala Menteri betemu enggau iya (Zahid) aku enda nemu pasal nya,” ku Nanta lebuh ditanya pasal pekara nya.

    Kelimpah ari nya, Zahid nengah penerang iya dalam Facebook kemari ningkah ripot berita iya nya PBB pansut ari BN.

    Zahid madahka diri enda nemu pasal ripot berita nya.

    Iya mega madahka diri nadai betemu enggau Kepala Menteri Datuk Patinggi Abang Johari Tun Openg ti mega Presiden PBB, pasal pekara nya.

    “Ripot pasal PBB Sarawak ti dipadahka udah pansut BN, aku enda nemu.

    “Lalu aku mega nadai betemu enggau Datuk Patinggi Abang Johari Tun Openg sereta nadai minta sida (PBB) enda ninggalka BN,” ku iya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads