Header Ads

  • Berita Tebaru

    Pemansang di Sarawak nyungkak peminta kuasa karan

    PEMINTA TI TINGGI: Peminta kuasa karan nyangka deka manggai ngagai urung 5,500MW datai ba taun 2020.

    KUCHING: Peneras pemansang di Sarawak udah mai pengerembai besai ba peminta ngagai kuasa karan Sarawak. Peminta kemaya hari enggau dudi hari dipelaba deka nambah ngagai urung 5,500MW datai ba taun 2020.

    Perintah Nengeri nengah Opis Menteri Bekal Ai enggau Elekterik Menua Pesisir udah ngelempaika pengandal ngagai Sarawak Energy Berhad (SEB) enggau tanggungpengawa ngenataika sistem bekal kuasa karan ti tegap enggau likun.

    Dikena nangkup peminta diatu enggau dudi hari sereta meri peranak Sarawak sistem bekal kuasa karan ti moden enggau ulih dikeandal ti patut ngagai rayat, SEB nyenggala beranakka puku dikena nyamin enggau nempa kapasiti pemansut, ngangkatmanahka sistem grid bekal kuasa karan nengeri, sereta ngaga perengka guna enggau infrastruktur ke baru. Taja pia, peranak Sarawak seruran ngasaika tarif kuasa karan pemadu baruh di Malaysia lalu antara pemadu baruh di rantau tu.

    Projek ungkup ngemodenka infrastruktur kuasa karan meseti ditembu nitihka timpuh enggau perambu belanja, enti enda bisi risiko besai ngembuan sistem ti enda tetangkupka peminta Sarawak kemaya hari, tau ngasuh bekal kuasa karan enda chukup.

    Ngemujurka pekara tu, raban ti megai lisin Sarawak Energy, Syarikat SESCO Berhad (SESCO), patut bisi akses ngagai taba projek. Sarawak Electricity Ordinance ngemendarka sida ti megai lisin tama enggau bejalaika kereja infrastruktur elekterik.

    Sebayang bayar pampas bekaul ke bukai, seriris enggau kadar standard ti patut, enggau pilih bayar ex-gratia ti ulih diterima. Tuju ex-gratia tu dikena ngurangka penanggul ti enda sengaja ngagai raban ti nuntut rambau pejalai projek infrastruktur elekterik tu.

    Sida ti nuntut tanah ti kena pangka udah bekerejasama enggau tim projek sereta ejensi perintah, ngemendarka pejalai pemansang kuasa karan lanchar sereta ngangkatmanahka projek di nengeri tu pulaika pemaik peranak Sarawak.

    Ba peminta pengelurus, konsultan enggau ngaul sida ti nuntut tanah ke pangka suah diatur enggau penatai bala ejensi perintah. #UtusanBorneo

    No comments

    Post Top Ad