Pemansang ti agi kurang di ulu Selangau deka diputar - Berita Iban Online

Header Ads

  • Baru Nyadi

    Pemansang ti agi kurang di ulu Selangau deka diputar

    RAMI: Mensia mayuh nedat ruai Rumah Jelaping ngulu Pengerami Ngiling Bidai Renggat P.214 Selangau ba Rumah Jelaping, Selangau, Tatau, kilah ensana.

    SELANGAU: Penanggul agi tinggal pemansang ke ditapi peranak rumah panjai tungga ke ulu di Parlimen Selangau nyadika batang pekara deka diaduka Kaban Parlimen Selangau, Baru Bian.

    Iya nemu parlimen nya bangat besai lalu tebal agi genturung menua baka Sungai Kakus, Anap enggau Ulu Sangan mengkang nengah jalai kem batang kelimpah agi merau enti deka mindah ke bukai nyentuk ke diatu.

    “Laban ti kelalu jauh ke ulu sekeda genturung menua empai disambung karan enggau jalai alun.

    “Aku naka ulih ngaduka pekara tu nyengkaum ngumpul penerang ke bekaul sebedau dianjung ngagai piak ti tinggi agi,” pia ku iya madah.
    Iya mantaika pekara tu maya bejaku ba Pengerami Ngiling Bidai Renggat P.214 Selangau ba Rumah Jelaping, Selangau, Tatau, kilah ensana.

    Bela datai maya tu iya nya Chairman Komiti Pengatur, Tuai Rumah Jelaping Sumok enggau Penyanding Penemu Pengerami, Joshua Jabing.

    Nambahka jaku iya baru, ku Baru, iya deka meda pemansang infrastruktur ke diatu mengkang ditandu sereta diteruska.

    “Nya alai, kitai minta bala tuai raban bansa enggau tuai rumah ke megai menua ti empai bisi pemansang tau nganjung peminta nya ngagai aku,” ku iya madah baru.

    Bekaul enggau pemansang pelajar enggau penatai pemisi rayat di parlimen nya, Baru ngarapka rayat Selangau ngemeratka pemujur pelajar anak sida.

    “Kitai ditu bisi tiga buah sekula sekondri iya nya SMK Tatau, SMK Ulu Balingian enggau SMK Luar Bandar No 1 Sibu sereta 37 buah sekula primari iya nya 15 buah di pelilih Tatau enggau 22 buah di pelilih Selangau.

    “Penyampau sekula tu deka ngelantangka agi bala apai indai nyengulaka anak sida baik nya di pelilih Tatau tauka Selangau,” pia ku iya nerang.

    Kaban Kunsil Nengeri Ba’kelalan nya mega mai rayat dia ngembuan timpai ke jauh dikena beserakup enggau pangan diri ngelawa tuju mai pemujur ngagai menua enggau bansa.

    “Sekali agi aku ngarapka ADUN Tamin enggau Kakus ulih bekerejasama enggau aku nyungkakka pemansang rayat ba parlimen tu,” ku iya madah. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads