Penyampau kes HFMD di Sarawak bisi nurun, ku Dr Jamilah - Berita Iban Online

Header Ads

  • Baru Nyadi

    Penyampau kes HFMD di Sarawak bisi nurun, ku Dr Jamilah

    Sekeda ari gambar penyakit jari, kaki enggau nyawa (HFMD).

    KUCHING: Penyampau semua kes penyakit jari, kaki enggau nyawa (HFMD) di Sarawak bisi nurun ba minggu ke-22 taun tu, dibandingka minggu sebedau nya.

    Direktor Opis Pengerai Nengeri Dr. Jamilah Hashim madah, penyampau kes ari 1 Januari ngagai 2 Jun 2018, kumulatif kes HFMD ba Sarawak bisi 2,611 kes.

    “Ba minggu ke 22 (27 Mei ngagai 2 jun 2018), penyampau kes baru ti diriputka bisi 113, bisi ngayanka penurun sepenyampau 106 kes dibandingka 219 kes ke diripot ba minggu sebedau nya.

    “Lalu Bagi Menua ti ngeripotka kes pemadu tinggi iya nya di Kuching, Bintulu, Samarahan, Sri Aman enggau Sibu.

    “Taja pia penyampau kes tu dipelabaka deka nambah ba minggu ke bukai enti nadai atur bejejaga,” ku Dr Jamilah nengah penerang berita ngagai Utusan Borneo, kemari.

    Nambahka nya, iya madahka penyampau kes masuk wad ketegal HFMD berengkah 1 Januari ngagai 2 Jun 2018, bisi 101 kes.

    Nitih ku iya, tebal agi nya ketegal kurang ngambi pemakai sereta ketegal ‘demam tinggi’. Taja pia, nadai kes ti balat diripot.

    “Ba minggu ke-22 mega, bisi 5 kluster HFMD ti mungkur empat buah ruang bilik enggau sebuah palan pengibun anak mit, ti ngujungka penyampau semua bisi 174 kluster naka taun tu.

    “Tebal agi tumpuk mungkur ruang bilik sereta semina 21 atur nutup sementara prasekula tauka palan pengibun anak mit bisi dipejalaika,” ku iya.

    Dikena nyeliahka igi penyakit tu berampit kelebih agi maya kemisi sekula, Opis Pengerai Nengeri Sarawak ngelalau mensia mayuh ngambika seruran beratka pengawa nagang, laban penyampau kes HFMD ti tinggi diripot di Sarawak kenyau ari minggu nyin tadi.

    Jampat berampit ketegal ti kelalu semak enggau pangan diri baka maya besekut ba endur ke mayuh orang nyerumba kemisi panjai, nyerumba Hari Gawai Dayak enggau Hari Raya.

    “Enti anak mit nya baka ke enda gerai tauka majak sakit, apai indai dilalau ngambika mai anak nya betemu baru enggau lutur sida empu tauka terus ngagai sepital ke semak ngambika diperesa sereta diperubatka.

    “Lalu pengerai anak mit enti datai ba palan pengibun anak mit patut diperesa tiap hari ngambika nemu gaya kelai tauka ulah ti nyelai.

    “Nyema bisi anak mit ditemu bisi penyakit berampit patut anang begulaika enggau orang bukai baka sementara asuh diau ba bilik bukai (ungkup palan pengibun anak mit) tauka ba opis Kepala Pengajar (ungkup tadika). Apai indai enda tau enda dipadah enggau lengkas awakka ulih nganjung berubat sereta enda diasuh begulai enggau orang ba rumah tauka ba sepital,” ku iya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads