Header Ads

  • Berita Tebaru

    Peranak Bekelit Ili, Ulu Niah nandu pengawa miring ba tanah sida

    BESERAKUP: Peranak Bekelit Ili, Serunggut enggau Bekelit Ulu kering begulai enggau pangan diri ngetanka hak ba tanah diri empu. 

    MIRI: Peranak Bekelit Ili, Serunggut enggau Bekelit Ulu nandu pengawa ngatur pengawa miring ba tanah sida di Bekelit Niah sepengudah tanah nya diambi orang ba taun 2008.

    Sida tu datai ari Rumah Jambai Jali, Rumah Edward Ekau enggau peranak menua Bekelit Ulu.

    Tuju sida tu miring laban deka minta berkat petara ngintu sereta nyaga menua sida ari ti dikeruga.

    Piring sida mega dikena minta diri bulih pengelantang, penyamai sereta pengelikun ngambika enda ditinggang penusah ke enda disadang nyadi.

    Pengawa sida ke miring tu digaga ninting taun kenyau ari taun tanah sida nya diambi.

    Kena Disember 2013, Tr Jambai enggau Tr Rumah Edward ngaga sekat keterubah ba tanah sida ketegal ti enda lantang ati meda tanah nya diambi enggau nadai pemendar.

    Tang sekat ke digaga nya dirumpang raban penerit adat ti bisi datai kia.

    Ukai semina sekat nya dirumpang tang piring sida mega dikenyati.

    Taja pia, sida nadai kala diberi pemali enggau pampas.

    Pekara nya ukai ngelemi sida tiga bengkah menua tu tang madahka nya nejuka sida ransing agi beserakup enggau pangan diri ngetanka hak ba tanah diri empu. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: