Perintah Nengeri ngemeratka peneka enggau juluk rayat - Berita Iban Online

Header Ads

  • Baru Nyadi

    Perintah Nengeri ngemeratka peneka enggau juluk rayat

    Kepala Menteri Datuk Patinggi Abang Johari Tun Openg

    KUCHING: Perintah Nengeri Sarawak deka nelebaka iring perintah nitihka peneka enggau juluk rayat.

    Kepala Menteri Datuk Patinggi Abang Johari Tun Openg madahka, Perintah Nengeri deka ngangkatka chara ngurus nengeri enggau lebih tebuka dalam penemu kerejasama entara parti ke lebih entap tauka tegap.

    Ku iya, Pengawa Bepilih Besai udah tembu sereta rayat udah ngaga pemutus meri mandat ngagai Perintah Baru ngiring menua.

    Berindik ari ubah politik menua, parti komponen Barisan Nasional (BN) Sarawak ngaga pemutus pansut ari BN sereta beserakup dalam Gabungan Parti Sarawak (GPS), ku iya.

    "Nyadi chairman GPS tu, aku meri terima kasih ngagai BN ti udah besaup tauka besukung penemu enggau kerejasama ngelama tu.

    "Numbuhka platform politik ti baru di Sarawak iya nya senipak enggau juluk enggau peneka rayat nengeri tu ti mayuh pupu bansa enggau pengarap.

    "Nengah serakup politik baru tu, Perintah Nengeri Sarawak deka nelebaka iring perintah nitihka peneka enggau juluk rayat seraya ti ngangkatkachara ngurus nengeri enggau lebih tebuka dalam penemu kerejasma entara parti ke lebih entap tauka tegut," ku iya mansutka pekara nya dalam jaku pesan iya nyerumba pengerami Hari Raya Aidilfitri 2018, sehari tu.

    Lebuh ke ngenang pengerami Hari Raya Aidilfitri, iya mai rayat ti enda ngira bansa enggau jalai pengarap ba nengeri tu sama ngerami sereta ngerapitka agi kaul enggau pangan diri.

    Iya bepenemu pengawa ngabang ngagai pangan diri patut dipajakka ngambika Hari Raya lebih besai reti  ngagai semua.

    "Aku enggau bini aku deka ngatur rumah tebuka ba BCCK di Kuching ba Hari Keterubah enggau Kedua Hari Raya Aidilfitri ari pukul 10 pagi ngagai 4 lemai.

    "Aku enggau bini aku sereta kami sebilik meri: "Selamat Hari Raya Aidilfitri. Maaf Zahir Dan Batin" ngagai semua rayat Nengeri Sarawak," ku iya seraya ngelaluka penatai mensia mayuh ngabang ngagai iya ba BCCK. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads