Header Ads

  • Berita Tebaru

    Presiden FAS dipinta ngaga ripot polis bekaul enggau pengelenyau duit 91 juta

    Menteri Dagang Temuai, Seni, Adat Asal, Nembiak  Lumba enggau Main, Datuk Abdul Karim Rahman Hamzah.

    KUCHING: Menteri Dagang Temuai, Seni, Adat Asal, Nembiak  Lumba enggau Main, Datuk Abdul Karim Rahman Hamzah madahka diri tekenyit ninga ripot ti madahka RM91 juta lenyau ari akaun Serakup Main Bol Sarawak (FAS).

    Nitih ku iya, FAS suah napi penanggul belanja, kala ngatur beberapa randau enggau iya sereta kepala menteri bekaul enggau penanggul ditapi sida ba pengawa ngatur serakup nya.

    “Tekenyit mega lebuh dipadahka FAS bisi duit ngemayuh nya, RM91 juta, laban baka ti ditemu aku sebedau tu, sida bepenanggul ba pekara belanja.

    “Enti sema pekara baka tu amat nyadi, aku ngarapka presiden FAS ngaga ripot ngagai raban ti patut ngambika pansik ulih dipejalai lalu atur patut ulih jampat digaga.

    “Laban kitai enda nemu serakup lumba enggau main kitai dipegai sida ti enda lurus, FAS nitihka pengamat ngatika diri lalu semina siti tu aja serakup ke ari suba, sida dipegai sida empu,” ku iya lebuhka dikerandau pengudah aum pengarang berita RWMF 2018 diatur ditu, kemari.

    Taja pia ku iya nyemetak madah, perintah nengeri semina berati ari jauh enggau matau sida laban serakup tu ukai di baruh pegai perintah nengeri ke amat.

    Berebak enggau nya, iya madahka perintah nengeri tetiap taun deka meri agih belanja khas ngagai serakup FAS sepenyampau RM3.5 juta.

    Taja pia ku iya, penyampau nya enda chukup, nya alai FAS mega nerima belanja enggau pemeri ari kompeni luar ti dirintai dalam bursa saham tauka raban ngatika diri.
    Tu dikena melanja pemain enggau ungkup ngatur kereja, sekalika nyapai manggai 90 juta nya, aku enda nemu, ku iya nerang.

    “Kepala menteri bisi madah ngagai aku ngambi beratika FAS nentuka serakup nya ditusun baru ngambika ulih diintu enggau manah sebedau tu.

    “Aku benung berati laban aku mega nemu FAS, sida enggaika orang luar nyengkaum kitai tu masuk champur, tang ketegal nama Sarawak bisi tempias mimit.

    “Kelimpah ari nya, kitai mega melanja duit tutu sida tang deka naka ulih ngelalau struktur ngatur pengawa FAS tu enggau manah lalu ulih ngemansangka main bol di Sarawak,” ku iya nandu.

    Ku iya, enti sema serakup ti semina siti tu enda diintu memanah, nitihka selama kitai enda nerima pemutus tauka prestasi ti manah ba pekit ari bala pemain.

    Perintah nengeri enggai ninga bala pemain enda dibayar gaji, enda dibayar EPF enggau ke bukai.

    Karim madah ngagai pengarang berita ke alai iya deka ngatur randau enggau Presiden FAS ngenukuka pekara nya lalu berandauka salah guna belanja enggau nusun baru struktur FAS. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: