Raban volunteer enggau kaban NGO patut chakah agi mantu raban kurang benasit, ku Dennis - Berita Iban Online

Header Ads

  • Baru Nyadi

    Raban volunteer enggau kaban NGO patut chakah agi mantu raban kurang benasit, ku Dennis

    TEPA: Wan, Dennis, Dr Ling enggau Chong ngemata ke sida netak ribbon maya ngelancharka Giving Hope, Sharing Love No.1 enggau pengerami makai lemai ngenang jasa di Live Animals Medical Centre di Piasau ditu.

    MIRI: Raban volkunteer enggau sida ari sektor korporat sereta gempung ukai dikuasa perintah (NGO) dipinta chakah agi gawa enggau mantu raban ti kurang benasit enggau kaban gempung pengintu pengelantang.

    Ba pekara tu, Kaban Kunsil Nengeri (ADUN) Telang Usan, Dennis Ngau madahka gempung pengintu pengelantang tu nanggung belanja besai ninting bulan dikena bejalaika pengawa sida.

    “Perintah enggau gempung pengintu pengelantang enda ulih ngereja pengawa tu (mantu rayat) kediri aja, nya alai kami begunaka saup ari semua orang. Kami ngelaluka semua bansa bantu dikena mantu rayat kitai,” ku iya lebuh pengawa ngelancharka Giving Hope, Sharing Love No.1 enggau pengerami makai lemai ngenang jasa di Live Animals Medical Centre di Piasau ditu, apin lama ke udah, ke alai lebih 100 iku volunteers ari Hope Place Kuching ngulu pengawa tu.

    Dennis nyemetak madah taja iya udah gawaka rayat di sitak iya lebih lapan taun diatu kenyau ari taun 2011, agi tubah pekara ti patut bedau digaga.

    “Taja semua pengawa udah dipejalaika enggau digaga perintah nengeri enggau aku ti nyadi pengari rayat, tang agi mayuh pekara ti patut digaga.

    “Nya alai, kami deka ngelaluka semua bantu ti ulih seruran diberi ngambika rayat kitai ulih ngerumban bantu sereta mega ngemai rayat kitai mansang dalam pemansang industri hiliran,” ku iya.

    Ba pengerami nya, Dennis muji Hope Place Kuching dibaruh embing pemungkal iya, Kelvin Wan ba pejalai inisiatif sida mantu ngelempungka tating penusah bala komuniti Orang Ulu, kelebih agi bansa Penan, nengah misin Giving Hope, Sharing Love sida.

    “Aku ngaku awak ti dilimpang enggau pengeran sida gawa ngemujurka misin tu.

    “Tu pengawa dikedekaka kitai, kitai begunaka rayat baka semua kita ti mantu dunya nyadi endur meruan agi ungkup semua orang nyengkaum sida ke diau di menua ulu,” ku iya nambah.

    Sama bisi datai rambau pengerami makai lemai nya iya nya ketuai konvoi Dr Ling Tung King enggau LONGi (Kuching) Sdn Bhd ti diarika Chong Wai Ling.

    Seraya Wan madahka misin pengawa pengasih udah diatur keterubah iya ungkup peranak di kandang menua Ulu Baram.

    “Rambau pejalai nya, raban volunteer kitai mega datai ari bala lutur, indu misi, lutur ngeli enggau tukang guntin ti udah bejalaika pengawa meresa pengerai, meresa ngeli enggau ngempat buk.

    “Kitai mega deka ngelekatka lampu solar ngagai peranak di Ulu Baram,” ku iya.

    Misin nya berengkah tumu pagi sehari udah pengerami makai lemai ke alai bisi 36 buah 4WD enggau lebih 100 iku volunteer ari mayuh bengkah menua nyengkaum Miri, Kuching, Sibu, Sabah enggau Brunei sereta bala pengari ari Sarawak Nursing Professional Association (SNPA) udah ngambi bagi. 

    Raban volunteer udah nya bejalai ngabas ngagai beberapa buah rumah panjai enggau genturung pengentap pendiau bansa Penan di Ulu Baram nyengkaum Long Siang, Long Seridan, Long Luding sebedau sida nembuka misin di Long Selulong.

    Program outreach tiga hari berunggu udah tembu kemari, 17 Jun. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads