Header Ads

  • Berita Tebaru

    Rayat Sarawak enggai nerima UMNO, ku Fazzrudin

    Sapit Ketuai Bagi Nembiak Parti Pesaka Bumiputera Bersatu (PBB), Fazzrudin Abdul Rahman.

    KUCHING: Sapit Ketuai Bagi Nembiak Parti Pesaka Bumiputera Bersatu (PBB), Fazzrudin Abdul Rahman pechaya rayat nengeri tu enggai nerima UMNO tama enggau mudah.

    Fazzrudin ke mega Kaban Kunsil Nengeri (ADUN) Tupong, madahka baka Parti Keadilan Rakyat (PKR), UMNO mega sebuah parti ke asal ari Semenanjung Malaysia.

    Berindik enggau nya ku iya, kitai meseti meri jamin ngagai rayat nengeri tu ba sentang tuju enggau kuing parti ke asal ari Sarawak ke diatu megai perintah.

    “Pekara ke patut digaga iya nya meri penerang ngagai rayat sentang tuju enggau kuing parti kitai.

    “Kitai meseti meri jamin ngagai rayat ngambika sida ulih mida sereta nyukung kitai,’ku iya.

    Iya mansutka jaku nya lebuh dikerandau ba Pengawa Ngelalu Pengabang nyerumba Hari Raya Aidilfitri ke diatur di Dewan Bahasa dan Pustaka (DBP) ditu, kemari.

    Fazzrudin nambah, di Sarawak kitai bisi empat parti ke begempung dibaruh siti perabung iya nya PBB, Parti Rakyat Bersatu Sarawak (SUPP), Parti Rakyat Sarawak (PRS) enggau Parti Demokratik Progresif (PDP).

    Gempung empat parti ke numbuh Gabungan Parti Sarawak (GPS) deka beratka pekara dalam Sempekat Malaysia 1963 (MA63) dikena nentu hak rayat enggau nengeri diintu enggau manah.

    Kelimpah ari nya, gempung mega deka nentuka atur pemansang di nengeri tu digaga nengah chuan Sarawak empu.

    “Udah tentu rakyat ulih mida pekara ke manah ungkup ngenanka hak sida.

    “Aku pechaya gempung tu deka ngulihka hak rayat sereta terus dikearap enti dibandingka enggau parti bukai ke datai ari Semenanjung Malaysia,” ku iya. 

    Dulu agi ari tu, Sekretari Besai Kelab Veteran UMNO Datuk Mustapha Yaakub madah, UMNO diatu tau dikerembai ke Sarawak pengudah empat parti dalam gempung nya nyerara diri ari Barisan Nasional (BN).

    Ku Mustapha, pemutus nya meri jalai ngagai UMNO tama ke Sarawak. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: