Sarawak dikeandal ulih menang kes Petronas - Berita Iban Online

Header Ads

  • Baru Nyadi

    Sarawak dikeandal ulih menang kes Petronas

    Menteri Muda Undang-Undang, Kaul Nengeri enggau Perintah Besai sereta Matau Projek, Sharifah Hasidah Sayeed Aman Ghazali

    KUCHING: Menteri Muda Undang-Undang, Kaul Nengeri enggau Perintah Besai sereta Matau Projek, Sharifah Hasidah Sayeed Aman Ghazali andal Sarawak ulih menang ba kes Petronas, ti minta nerangka status sida bepelasarka Akta Pemansang Petroleum 1974 (PDA) di Kort Perintah Besai.

    Kenu ku iya, tim undang-undang nengeri udah sedia napi isu Petronas nya lalu senjata besai iya nya dokumen-dokumen ke udah dibai ari misyen bekaul hak Sarawak dibaruh Sempekat Malaysia 1963 (MA63) di London, sebedau tu.

    “Dokumen ari London mayuh mantu, semua nya tulen lalu semua dokumen ke dibai kitai pulai tu deka dikena magang nyadi bukti ke dikena ba kort ila.

    “Enggau nya, kitai andal ulih menang dalam negika hak eksekutif minyak enggau gis Sarawak lalu tu mega batang penemu ari perintah negeri,” ku iya.

    Iya madah munyi nya rambau dirandu maya ngulu Pengerami Ngelalu Pengabang Hari Raya ke diatur ba Dewan Bahasa dan Pustaka, ditu kemari.

    Taja pia, Hasidah madah sebarang pemutus ke digaga perintah nengeri endang bepanggai ngagai pemutus bechara isu nya, ditaga diatur kena 12 Jun ba Kort Perintah Besai tang dilanjar ngagai haribulan bukai, 21 Jun tu.

    “Kitai nganti lalu meda nama pemutus kort kena 21 Jun ila sekalika sida ngemendarka pinta Petronas tauka enda ari nya, kitai deka berati nama pemutus ke deka digaga.

    “Naka tu, kitai enggai berumban tauka sengapa ngaga sebarang pemutus,” ku iya.

    Kena 4 Jun tu tadi, Petronas ngerikodka pinta ba Kort Perintah Besai dikena ngenukuka pekara bekaul PDA nyadi undang-undang ke dikena ungkup industri petroleum di Malaysia.

    Nitihku kompeni minyak enggau gis nasional nya, sida endang pemenggi eksklusif pengeraja asal petroleum, sereta nguasa industri penatai pemisi nya ba selampur menua Malaysia nyengkaum ba Sarawak.

    Pekara nya dikenuku Opis Luyar Besai Sarawak ti ngaku nerima notis ari Pengerejister Kort Perintah Besai iya nya perintah nengeri nyadi piak ba saman ti dibantai Petronas nya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads