Tangki ai ti dikunsi rayat di pasar Kanowit enda kala ditukar kenyau ari taun 60-an kelia, ku Thomas - Berita Iban Online

Header Ads

  • Baru Nyadi

    Tangki ai ti dikunsi rayat di pasar Kanowit enda kala ditukar kenyau ari taun 60-an kelia, ku Thomas

    Chairman Parti Keadilan Rakyat (PKR) Kanowit Thomas Laja.

    SIBU: Sistem ai beresi di pasar Kanowit enda ulih enda dikemanahka agi bepun ari penyampau tubuh mensia majak mayuh nambah.

    Chairman Parti Keadilan Rakyat (PKR) Kanowit Thomas Laja madah, tangki ai ti dikunsi rayat ke diau ba pasar nya enda kala ditukar kenyau ari taun 60-an suba.

    “Diatu penyampau mensia mayuh ke diau ba pasar Kanowit nambah empat ngagai lima kali lipat nejuka ai enda chukup dibagi.

    “Nya alai, kitai minta perintah nengeri betataika pekara tu ngambika rayat bela ngasaika pengelantang ari perengka guna ti chukup,” pia ku iya maya berandau enggau pengarang berita, kemari.

    Thomas mega madah, baka di Rumah Awin, Sungai Mapai, peranak rumah panjai nya udah betaun meda paip ai tang nyentuk ke sehari tu empai kala nyepi ai beresi.

    “Sida semina asa meda tang agi betimbunka ai ujan.

    “Ngandalka ai sungai ari Sungai Mapai endang enda ulih dikena agi, udah kelalu kamah ketegal kebun sawit ke besemak.

    “Penusah tu ukai diasaika sida ba rumah panjai nya aja tang nyengkaum di SK Balingiau,” ku iya madah baru.

    Kelimpah ari ai, iya madahka pasar Kanowit nyauka tiap hari nadai karan.

    Ku iya, iya udah mantaika penusah nya empai lama tu tadi tang laban ke empai lantang ati iya sekali agi mai pekara nya ngagai media.

    Berindik ari nya, Thomas madahka perintah nengeri enda ulih nyeliahka diri ari bejalaika tanggungpengawa ngambika rayat di Kanowit bela ngasaika pengelantang ba perengka guna.

    “Kitai mejah sida ke nyadi pengari rayat ditu laban ti semina megai gelar YB aja tang nadai kala mantaika diri bebendar mai pengelantang ngagai rayat.

    “Ngarapka pengawa bepilih nengeri ti deka datai rayat patut berunding nadai guna milih orang ti enda tepegaika pengawa nyadi pengari rayat.

    “Nadai guna milih orang baka nya laban kitai ke nyadi rayat begunaka orang ti endang ulih mantai sereta mutar nama-nama penanggul ke bisi nyadi,” pia ku iya nambah. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads