Header Ads

  • Berita Tebaru

    Tim Pengereja Pengawa mansik MA63 deka ditumbuh

    NEMPA KEREJASAMA: Hasidah (lima ari kiba) begambar enggau raban luyar ke bisi datai betemu sereta berandau enggau Kepala Menteri, kemari. Sama bisi (lima ari kanan) Ranbir enggau (empat ari kiba) Mandal Chairman PKR Nengeri, See Chee How.

    KUCHING: Menteri Muda Undang-Undang, Kaul Nengeri-Perintah Besai enggau Pematau Projek, Sharifah Hasidah Sayeed Aman Ghazali madahka Gerempung Peguambela Sarawak deka numbuhka Tim Pengereja Pengawa ti mansik silik semua pekara bekaul enggau Sempekat Malaysia 1963 (MA63) sereta hak Sarawak.

    Hasidah, madahka Kepala Menteri Datuk Patinggi Abang Johari Tun Openg setuju enggau penumbuh nya.

    Bepelasarka penerang Presiden Gerempung Peguambela Sarawak Ranbir Singh Sangha kemari, Tim Pengereja Pengawa nya ditumbuhka sehari tu.

    “Gerempung Peguambela Sarawak deka numbuhka siti Tim Pengereja Pengawa ti mansik silik semua pekara bekaul enggau Sempekat Malaysia sereta hak Sarawak.

    “Sida tu deka mantu perintah nengeri, lalu Kepala Menteri Datuk Patinggi Abang Johari Tun Openg udah setuju sereta kitai deka bekerejasama,” ku Hasidah lebuh dikerandau raban pengarang berita, kemari.

    Dulu ari nya, Hasidah begulai enggau Kepala Menteri sereta menteri kabinet ke bukai betemu enggau raban Gerempung Peguambela Sarawak ba opis Kepala Menteri di Begunan Kunsil Nengeri (DUN), ditu.

    Tuju pengawa betemu nya, Kepala Menteri Sarawak deka berandau sereta berunding enggau bala luyar pasal atur kort ti difailka Petroliam Nasional Berhad (Petronas) ngagai perintah nengeri.

    Berebak enggau tu, Ranbir lebuh dikerandau raban pengarang berita madahka sida nyukung penuh pengawa ngetanka hak Sarawak lalu Tim Pengereja Pengawa ti ditumbuhka dikena mantu dalam pekara nya.

    Gerempung Peguambela Sarawak sedia mantu ba pengawa ngelindung tauka nyaga semua hak nengeri, ku Ranbir.

    “Tim Pengereja Pengawa deka mansik semua pekara ke dibantaika lalu Tim Pengereja Pengawa ulih ditumbuhka pagila (sehari tu).

    “Timpuh endur mutarka pengawa nya bepanggai ba isu ke dibantai lalu kitai deka betapi sereta mutarka isu nya bererenggat,” ku iya seraya madahka tim nya dipasuk 10 iku luyar.

    Ranbir madah Tim Pengereja Pengawa nya deka berandau enggau Ketuai Akim Nengeri, pasal nya.

    “Raban luyar deka bejalaika pengawa nya enggau enda bebayar ketegal deka negika Sarawak,” ku iya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: