Header Ads

  • Berita Tebaru

    13 menteri, 23 sapit menteri kabinet baru udah angkat sumpah kemari

    GAWA BADAS: Yang di-Pertuan Agong Sultan Muhammad V (duduk, empat kanan) begambar kenang enggau bala menteri rambau Pengawa Angkat Sumpah ba Istana Negara kemari. Bela dipeda Menteri Besai Tun Dr Mahathir Mohamad (duduk, lima kanan) enggau Sapit Menteri Besai Datuk Seri Dr Wan Azizah Wan Ismail (duduk, tiga kanan). 📷 #Bernama

    KUALA LUMPUR: Bisi 13 iku menteri Kabinet enggau 23 sapit menteri, ngangkat sumpah pangku pengawa sida iya, enggau pengelurus sereta sumpah nyimpan rahsia ba mua Yang di-Pertuan Agong Sultan Muhammad V di Istana Negara.

    Pengawa nya digaga di Balairong Seri, bela digulu ulih Menteri Besai Tun Dr Mahathir Mohamad enggau bini iya, Tun Dr Siti Hasmah Mohamad Ali enggau Sapit Menteri Besai, Datuk Seri Dr Wan Azizah Wan Ismail.

    Pengawa ngangkat sumpah nya kemari ngujungka pemayuh menteri dalam kabinet Dr. Mahathir manggai urung 26 iku, 13 menteri sebedau tu udah ngangkat sumpah kena 21 Mei tu tadi.

    Pengawa ke berengkah digaga dalam pukul 11 pagi nya, dipunka enggau rintai keterubah bala menteri ke betuaika Kaban Parlimen (MP) Muar Syed Saddiq Syed Abdul Rahman ke dipadu mangku pengawa nyadi Menteri Nembiak, Lumba enggau Main.

    Iya disempulang MP Alor Gajah Mohd Redzuan Md Yusof (Menteri Pemansang Pengawa Dagang); MP Kuala Langat Dr A. Xavier Jayakumar (Menteri Ai, Tanah enggau Pengeraja Asal); MP Parlimen Kulim-Bandar Baharu Datuk Saifuddin Nasution Ismail (Menteri Pengawa Dagang Dalam Menua enggau Pekara Bebeli Barang; MP Selangau Baru Bian (Menteri Kereja Raya); MP Indera Mahkota Datuk Saifuddin Abdullah (Menteri Menua Luar) enggau MP Seputeh Teresa Kok Suh Sim (Menteri Pengawa Industri Besai).

    Lebuh nerima surat chiri tuduh pangku pengawa, Syed Saddiq macha ikrar sumpah pangku pengawa sereta pengelurus sebedau nyain surat rasmi tuduh pangku pengawa ke bela besaksika Akim Besai Sabah enggau Sarawak Tan Sri Richard Malanjum ke ngarika Kepala Akim Menua enggau Kepala Sekretari Menua, Tan Sri Dr Ali Hamsa.

    Rintai kedua menteri ke ngangkatka sumpah betuaika MP Parit Buntar Datuk Dr Mujahid Rawa (Menteri di Opis Menteri Besai - Pengarap); MP Bakri Yeo Bee Yin (Menteri Kuasa, Teknologi, Sains, Gaya Mua Hari enggau Rampa Menua); MP Shah Alam Khalid Abd Samad (Menteri Wilayah); MP Batu Sapi Liew Vui Keong (Menteri ba Opis Menteri Besai - Undang-Undang); MP Penampang Ignatius Darell Leiking (Menteri Pengawa Dagang Entarabansa enggau Industri); enggau MP Silam Datuk Mohamaddin Ketapi (Menteri Pengawa Dagang Temuai, Seni enggau Adat Pesaka).

    Rintai sapit menteri ke ngangkat sumpah ba atur pengawa nya, iya nya MP Sri Gading Datuk Dr Shahruddin Md Salleh (Opis Menteri Wilayah); MP Tanjung Piai Dr Md Farid Md Rafik (Opis Menteri Besai - Penyerakup Menua enggau Pengelantang Pendiau Rama); MP Kubang Pasu Datuk Ir Amiruddin Hamzah (Opis Menteri Wang); MP Kuala Pilah Eddin Syazlee Shith (Opis Menteri Komunikasi enggau Multimedia); MP Hang Tuah Jaya Shamsul Iskandar Md Akin (Opis Menteri Pengawa Industri Besai); MP Bayan Baru Sim Tze Tzin (Opis Menteri Pengawa Betanam Betupi enggau Industri Asas Tani).

    Rintai sapit menteri bukai nyengkaum MP Kuantan Fuziah Salleh (Opis Menteri Besai - Pengarap); MP Sungai Buloh R. Sivarasa (Opis Menteri Pemansang Menua Pesisir); MP Parlimen Gopeng Dr Lee Boon Chye (Opis Menteri Pengerai); MP Balik Pulau Bakhtiar Wan Chik (Opis Menteri Pengawa Dagang Temuai, Seni enggau Adat Pesaka); MP Stampin Chong Chieng Jen (Opis Menteri Pengawa Dagang Dalam Menua enggau Pekara bekait enggau Pengguna); MP Raub Tengku Zulpuri Shah Raja Puji (Opis Menteri Ai, Tanah enggau Pengeraja Asal); MP Pokok Sena Datuk Mahfuz Omar (Opis Menteri Pengereja Pengawa); MP Segambut Hannah Yeoh Tseow Suan (Opis Menteri Pemansang Orang Indu, Ruang Bilik enggau Komuniti; MP Bukit Mertajam Steven Sim Chee Keong (Opis Menteri Nembiak, Lumba enggau Main); MP Bangi Dr Ong Kian Ming (Opis Menteri Pengawa Dagang Entarabansa enggau Industri); MP Kulai Teo Nie Ching (Opis Menteri Pelajar); enggau MP Temerloh Mohd Anuar Mohd Tahir (Opis Menteri Kereja Raya).

    Sapit Menteri bukai ke ngangkat sumpah, iya nya MP Lumut Dr Mohd Hatta Md Ramli (Opis Menteri Pemansang Pengawa Dagang); MP Sepang Mohamed Hanipa Maidin (Opis Menteri Besai - Undang-Undang); MP Bandar Tun Razak Datuk Kamarudin Jaffar (Opis Menteri Pengangkut); MP Sepanggar Datuk Mohd Azis Jamman (Opis Menteri Dalam Menuai); enggau MP Kota Belud Isnaraissah Munirah Majilis (Opis Menteri Kuasa, Teknologi, Sains, gaya Mua Hari enggau Rampa Menua).

    Semua menteri enggau sapit menteri tu nyain surat rasmi tuduh pangku pengawa ba mua Richard enggau Ali.

    Penutup atur pengawa nya ditutup enggau bacha doa ulih Mufti Wilayah Persekutuan Datuk Dr Zulkifli Mohamad Al-Bakri.

    Kena 10 Mei tu tadi, Dr Mahathir, 92, ngangkat sumpah nyadi Menteri Besai Malaysia ketujuh, sehari udah Pakatan Harapan menang Pengawa Bepilih Besai ke-14 (PRU14) ke beratika 61 taun perintah Barisan Nasional (BN) diketuka tekala nya.

    Sapit Menteri Besai Datuk Seri Dr Wan Azizah Wan Ismail ti mega nyadi Menteri Orang Indu enggau Pemansang Ruang Bilik ngangkat sumpah betuaika rintai 13  raban Kabinet kena 21 Mei tu tadi. #Bernama

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: