Header Ads

  • Berita Tebaru

    500 hektar enda chukup ungkup siti komuniti

    Dr Johnical Rayong Ngipa

    KUCHING: Sitak Menua Bansa Asal tauka NTD ke diaku nengah  Rang Undang-Undang Kanun Tanah (Pindaan) 2018, enti dikemendar meseti nadai tatak pemesai bepelasarka pemayuh sesebengkah komuniti dibanding enggau tatak pemesai 500 hektar aja.

    Dr Johnical Rayong Ngipa (UPP-Engkilili) madah, penyampau 500 hektar ungkup siti komuniti engka enda chukup ba peranak  rumah panjai ke bisi ngembuan 100 tauka mayuh pintu begiga pemakai, ngiga ikan, ngasu enggau bumai.

    “Ari meri Suwa Sementara (PL), sitak menua bansa asal patut diberi suwa mendam enggau bungkur pemesai ke enda ditatak ngagai 500 hektar aja.

    “Bisi genturung pendiau baka ba emperan sungai ke besai bungkur tang bisi mega mit, nya alai 500 hektar endang enda chukup alai orang rumah panjai ngiga pemakai, berikan, ngasu enggau bumai,” ku iya.

    Iya madah munyi nya maya mantaika debat Undang-Undang Kanun Tanah (Pindaan) 2018 ti dibantaika Sapit Kepala Menteri Datuk Amar Douglas Uggah Embas ba aum DUN, Hari Tiga tu tadi.

    Nya alai, kenu ku Rayong peranak bansa asal patut diberi abis nadai 2,500 ekar dikena sida bejalaika pengawa betanam betupi.

    Taja pia, iya ngelaluka pasal Seksyen 6A iya nya seksyen baru dibaruh Kanun Tanah, nengah tu NTD ulih direjister lalu iya ke pemadu beguna surat ngempu tanah deka diberi.

    “Tu deka dikena enggau chara eksklusif ngagai peranak bansa asal ke tuju bejalaika pengawa betanam betupi tauka tuju bukai bepelasarka atur ke udah diletak direktor (Opis Tanah enggau Survei) dibaruh Seksyen 6A (3).

    “Ubah tu deka mutarka sekeda isu berat baka penyarut entara orang ngempu tanah NCR dibanding Opis  Tanah enggau Servei sereta kompeni swasta.”

    Ku iya, enti udah dikemendar, Rang Undang-Undang Kanun Tanah (Pindaan), 2018 deka ngemetulka pemutus Kort Perintah Besai sekeda kes pada 2016 ti mutuska adat ungkup Pemakai Menua enggau Pulau Galau (PMPG) ti nadai ngembuan kuasa undang-undang. #UtusanBorneo

    No comments

    Post Top Ad