Header Ads

  • Berita Tebaru

    ADUN Krian sedia meri kerejasama ngagai perintah nengeri

    Ali Biju

    KUCHING: Kaban Kunsil Nengeri (ADUN) Krian, Ali Biju besedia deka nempa kerejasama enggau perintah nengeri tauka ADUN ke bukai dikena nentuka pengelanchar tanggungpengawa ngagai rayat.

    Iya madahka betukar kuasa ukai semina meri penyelai ngagai kaul kereja entara perintah nengeri enggau perintah besai, tang mega udah meri kelala ngagai kitai, ADUN ari parti politik bebida, pemar baru ngemujurka mandat ti diberi rayat.

    Ngagai ADUN ti dibaruh perintah besai, pemar ngenukuka agenda rayat mujur deka lebih dikemerataka , lalu berebak enggau tu mega patut gawa enggau perintah nengeri ke diperintah Gabungan Parti Sarawak (GPS), ku iya.

    “Nya alai (aku) ADUN Krian ngambi peluang tu madahka diri sedia meri kerejasama, sereta ngelaluka ari perintah nengeri tu dikena ngenukuka tanggungpengawa kitai nyadi ADUN ke dipilih rayat dipejalaika enggau lebih manah, efisyen sereta ngena,” ku iya ti mega Kaban Parlimen Saratok.

    Ali mantaika pekara nya lebuh di bejuraika Usul Penghargaan Atas Ucapan TYT Yang di-Pertua Negeri Sarawak, maya baum Kunsil Nengeri Ke-18 Hari Ke-5 ba Kompleks DUN ditu, kemari.

    Kelimpah ari nya, Ali bepenemu pansik ti mungkur semua gaya pendiau kandang endur rayat Sarawak di Semenanjung Malaysia patut dipejalaika dikena nemu gaya sosio-ekonomi sida.

    Nya berindik ari pemayuh rayat nengeri tu ke diau di Semanjung Malaysia sekalaika gawa ba sektor perintah tauka sektor peribit sereta bisi mega ke diau mendam lalu udah bisi rumah diri empu, ku iya.

    Ku iya, nitihka anggar lebih kurang 40,000 orang Iban aja gawa ba Johor lebih agi ba kandang Pesisir Gudang enggau Masai.

    “Nya kebuah aku meri perambu ngambi dipejalaika pansik ti mungkur semua gaya pendiau kandang endur rayatrayat Sarawak di Semanjung Malaysia. Pansik tauka banci nya patut mungkur status sosio ekonomi sida.

    “Enti bisi ‘demography data’ nya deka ngemudahka pengawa matau pengelantang pendiau sida. Ngelama tu mayuh rayat Sarawak betapi enggau pemar ba nengeri orang sereta tusah  bulih bantu.

    “Nya alai aku meri perambu ngagai Perintah Nengeri Sarawak ngambika nambahka servis pengintu pengelantang pendiau tauka sebana ti diberi ulih Rumah Sarawak di Kuala Lumpur,” ku iya.

    “Ambika chunto, ditemu biai kes ti mengeksploitasi pengereja pengawa ari Sarawak ke suah nyadi. Selalu iiya sida sebana lebuh pulai ke Sarawak, nya bisi tusah endur Jabatan Tenaga Kerja nulung sida.,” ku iya.

    Berebak enggau tu lebuh ke ngenang pasal isu ba DUN Krian, Ali madahka mayuh kandang menua Saratok betapi enggau suntuk tauka nadai bekal ai beresi.

    Iya minta YAB Kepala Menteri ngambika ulih ngungkupka belanja perintah dikena bejalaika projek baka ba SK Ulu Sebetan enggau 4 buah rumah panjai ba sepemanjai Jalan Ulu Sebetan; SK Mudong enggau 8 buah rumah panjai ba Jalai Mudong; bisi 10 buah rumah panjai ba kandang endur Btayang; kandang menua Ulu Roban; Kampung Perpat, Kampung Paloh, Kampung Kaba, Lubok Nibong enggau Kali.

    “Enggau tu mega aku minta perintah besai ngambika lebih ngemeratka projek bekal ai nya,” ku iya ti mantaika sekeda ari isu dalam sitak DUN Krian. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: