Header Ads

  • Berita Tebaru

    Aque Owang Dheak Dhweh, nama reti jaku nya?

    Gambar pengias.

    Keterubah ia, aku deka minta ampun ari punjung pala nyentukKa ujung kaki sema buah  penemu aku ti deka dipejurai enda ngelantang ke ati bala pemacha BeritaIban.com.

    SEPIL JAKU IBAN TI BETUL
    Munyi ko sempama "Dikelala Buah Ari Langgu", Dikelala Bansa Ari Jaku, Dikelala Ulah Ari Penau, Dikelala Basa Ari Penyiru". 

    Nyadi munyi nya meh sempama jaku tuai .
    Kediatu, nembiak kemaya ari tu makin hari makin landik agi ngubah sepil jaku ti betul ngalih ke ngagai jaku "alien". Ambi ke  Chunto, Aku = Aque, Orang = Owang, Dia = Dheak, Deh = Dhweh. Bisi ke enda kitai berati ke semua tu?. 

    Nya alai jaku iban di sekula bisi 'Gerempung Kelab Jaku Iban' alai bala pengajar kitai iban ke landik jaku iban deka ngajar nembiak rebak baru jaku dalam kitai iban ambi ke enda punas ditelan dunya ti udah mansang.

    Kelimpah ari nya, nembiak kemaya ari mayuh agi enda entu nemu reti jaku dalam kitai iban ambi ke banding leka jaku dalam "Tebengkalai", reti "Tebengkalai" = "TEMBAWAI" munyi tu. "Sayau rumah sida sanu nya, nyau "TEMBAWAI" sepengudah apai enggau indai iya ngejang pegi. Reti "TEMBAWAI" tu ianya rumah ti nadai orang nguan tauka ngibun.

    Ngenang ke senentang Gerempung Kelab Jaku Iban di sekula, bala pengajar patut berati ke sepil leka jaku ti dikena nembiak enggau silik ngambika agi meruan sama enggau sepil asal jaku kitai iban.

    Ti ukai kitai sapa agi, ti ukai diatu kemaia agi?. Nuju bala nembiak rebak baru, anang kelalu terunda enggau sepil jaku ti singkat ba media sosial tauka jaku ari kita empu. kena meh jaku bansa kitai empu enggau betul ambi bansa bukai enda ketawa meda sepil jaku kitai iban makin ari makin lain agi dipeda sepil.

    Kitai iban patut chakah agi ngemeranka Jaku Dalam, Main Asal, Adat Asal enggau ti bukai. Ngambika enda lenyau lepau lesap pia aja.. 80% nembiak enda rindu ke main asal kitai ketegal pemansang dunya ngubah utai ke lama tau punas. Pia mega ngagai sida ke tuai anang enggai ngajar nembiak rebak baru ti rindu deka belajar ke main asal, adat asal enggau ti bukai.

    Nyadi aku empu rindu ke main asal kitai baka Beganu, Bepantun, Bebiau, Besangai, Nimang, enda nemu mayuh amat. Enti orang ngasuh nemu ga nyada seleka dua jaku berasuk dilah nyuruk.

    Udah tu aku deka belajar agi enggau sida ke tuai kada sida agi dapat ngajar kitai sentang main asal. Adat kitai bansa. Ngambika enda punas sereta bisi ditusi ke bala uchu, ichit, wit kitai jemah ila. 

    Nya alai jaku tu suah didinga Baka ijuk betampung penduk, baka ira betampung lemba, baka wie betampung tali, baka rutan betampung danan, nya alai pecah periuk tanah ganti periuk tani. Padam bulan ganti matahari, parai sida ke tuai ganti tubuh kami. Kitai ke rebak baru tauka dudi tu meh patut nampung utai ke lama udah dikemeran sida ke tuai ari kelia. 

    Nya aja penemu aku, minta ampun enti sema leka jaku bisi salah tusun salah ayun. Terima kasih.

    Ditengkebang menyadi kitai ke benama Denuesty Cuesly Anak Johnny, 20 taun, peranak ari nanga Baoh Batang Oya Dalat.

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: