#InjilSeharitu: 10 July 2018 - Hari Dua ba Minggu Ke Empat Belas Musim Selama - Berita Iban Online

Header Ads

  • Baru Nyadi

    #InjilSeharitu: 10 July 2018 - Hari Dua ba Minggu Ke Empat Belas Musim Selama

    Iya lalu bejaku ngagai sida murid Iya, “Utai ti diketau mayuh, tang orang ke ngetau mimit.

    Selamat pagi, 10 July 2018 - Hari Dua ba Minggu Ke Empat Belas Musim Selama, ngagai semua pemacha BeritaIban.com.

    Bacha Ke Satu:

    Hosea 8: 4 - 7, 11 - 13

    Ku TUHAN bejaku:
    Bala nembiak Aku udah milih raja, tang ukai dikemendarka Aku.

    Sida nuduhka orang nyadi tuai, tang ukai nitihka penemu Aku. Sida begagaka engkeramba ngena emas enggau pirak sida, kena sida ngerusak diri empu.

    Aku begedika sapi emas ti disembah orang di nengeri Samaria. Aku pedis ati ngagai sida. Ni pengelama baru sida deka diau tuchi di menua Israel?

    Engkeramba nya digaga tukang. Engkeramba nya ukai Allah Taala. Sapi emas orang Samaria deka dipechahka!

    Sida nanam ribut, nya alai sida deka ngetau kabut! Gandum sida nadai tangkai, lalu enda ulih mansutka roti.

    Tang enti sema iya ulih mansutka roti, orang bansa bukai ga deka makai roti nya.

    Makin mayuh agi alta digaga orang Israel kena muai dosa, makin mayuh agi ga endur alai sida bedosa!

    Taja pen Aku nuliska mayuh jaku ajar ke sida, tang sida ngumbai ajar nya nyelai.

    Taja pen sida rindu ngenjuk piring, lalu bepakaika dagin, tang TUHAN enda nerima piring nya. Diatu Iya deka ngingatka penyai sida lalu ngukum sida ketegal dosa sida.

    Sida deka pulai baru ngagai menua Ejip.

    Masmur Entara:

    Masmur 115: 3 - 4, 5 - 6, 7AB - 8, 9 - 10

    Saut (peda 9a): Panggaika pengarap kita ba TUHAN, kita orang Israel.

    Ke Satu
    Allah Taala kami di serega.
    Iya ngereja sebarang utai ti dikedekaka Iya.
    Engkeramba sida digaga ari pirak enggau emas, ditempa jari mensia.

    Saut: Panggaika pengarap kita ba TUHAN, kita orang Israel.

    Ke Dua
    Sida bisi lubang nyawa, tang enda nemu bejaku, bisi mata, tang enda ulih meda.

    Sida bisi pending, tang enda ulih ninga,
    bisi idung, tang enda ulih nyium utai.

    Saut: Panggaika pengarap kita ba TUHAN, kita orang Israel.

    Ke Tiga
    Sida bisi jari, tang enda ulih ngama utai,
    bisi kaki, tang enda ulih bejalai.

    Awakka semua orang ke nempa sereta manggaika pengarap sida ba engkeramba nya nyadi baka engkeramba ti udah ditempa sida.

    Saut: Panggaika pengarap kita ba TUHAN, kita orang Israel.

    Ke Empat
    Panggaika pengarap kita ba TUHAN, kita orang Israel.

    Iya nulung sereta nyaga kita.

    Panggaika pengarap kita ba TUHAN, kita imam Allah Taala.

    Iya nulung sereta nyaga kita.

    Saut: Panggaika pengarap kita ba TUHAN, kita orang Israel.

    Alleluia (peda John 10: 14)

    Alleluia, alleluia
    Aku tu pengibun bedus ti badas, ku TUHAN;
    Aku ngelala bedus Aku, lalu bedus Aku ngelala Aku.
    Alleluia.

    Bacha Injil

    Matthew 9: 32 - 38

    Siku lelaki ke bisu laban antu dibai ngagai Jesus.

    Lebuh antu nya udah diburu, orang nya lalu bejaku, lalu semua orang balat alit ati, ku sida, “Nadai utai baka tu udah kala dipeda di menua Israel!” Tang ku orang Parisi bejaku, “Iya muru antu ngena kuasa raja antu.”

    Jesus bejalai ngagai semua nengeri enggau genturung pendiau, ngajar dalam balai gempuru, nusui Berita Manah pasal Perintah Allah Taala, lalu ngeraika orang ari semua macham pemedis enggau penyakit.

    Lebuh Iya meda bala orang mayuh, Iya kasihka sida laban sida irau ati sereta nadai daya, baka bedus ti nadai orang ngibun.

    Iya lalu bejaku ngagai sida murid Iya, “Utai ti diketau mayuh, tang orang ke ngetau mimit.

    Nya alai besampi minta orang ke bempu umai ngirumka mayuh agi orang ngetau.”

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads