Header Ads

  • Berita Tebaru

    #InjilSeharitu: 11 July 2018 - Hari Tiga ba Minggu Ke Empat Belas Musim Selama

    Jesus lalu ngangauka dua belas iku murid ngagai Iya, lalu meri sida kuasa muru roh ti jai, sereta ngeraika semua macham pemedis enggau penyakit.

    Selamat pagi, 11 July 2018 - Hari Tiga ba Minggu Ke Empat Belas Musim Selama (Memorial of Saint Benedict, Abbot), ngagai semua pemacha BeritaIban.com.

    Bacha Ke Satu:

    Hosea 10: 1 - 3, 7 - 8, 12

    Orang Israel baka batang anggur ti lebat buah. Kaya agi sida, mayuh agi ga alta digaga sida. Mayuh agi asil ulih sida ari tanah sida, manah agi ga gaya tiang batu keramat ti disembah sida.

    Orang ke ati deka ngelakar enda tau enda natka pemerinsa ketegal dosa sida. Allah Taala deka ngerubuh alta sida, lalu ngerusak tiang keramat sida.

    Enda lama da agi orang tu deka nyebut, “Kitai nadai raja, laban kitai enda nangika TUHAN. Tang nama utai ti ulih dikereja raja ke kitai?”

    Raja orang Samaria deka ditabanka, baka ke nganyutka repik kayu ba ai.

    Rumah sembiang alai orang ke nyembah engkeramba ba tuchung bukit di Aben, alai orang Israel ti nyembah engkeramba, deka dirusak. Madang duri enggau rumput deka tumbuh lalu ngelamun alta sida. Orang mayuh deka ngangauka bukit, “Lalaika kami!” sereta ngangauka munggu, “Lamun kami!”

    Ku Aku bejaku, ‘Radu tanah bukai ke diri empu, tanam pengelurus, lalu ketau berekat ti deka datai ari pengangkun kita ke Aku. Tu meh maya kita patut nguingka diri ngagai Aku ti TUHAN kita, lalu Aku deka datai lalu nuang berekat ngagai kita.’

    Masmur Entara:

    Masmur 105: 2 - 3, 4 - 5, 6 - 7

    Saut (peda 4b): Sembah meh TUHAN berari.

    Ke Satu
    Belagu muji TUHAN.
    Tusui pasal utai ti badas ti udah dikereja Iya. Gaga ati meh kitai ke enggi Iya.
    Awakka semua orang ke nyembah Iya rami gaga magang.

    Saut: Sembah meh TUHAN berari.

    Ke Dua
    Mansang meh kitai ngagai TUHAN minta Iya nulung, lalu sembah Iya berari.

    Kingatka kereja ajih ti udah dikereja Allah Taala enggau ukum ti udah diletak Iya.

    Saut: Sembah meh TUHAN berari.

    Ke Tiga
    Kita peturun Abraham ke nembiak Iya
    kita peturun Jakop ti udah dipilih Iya:
    TUHAN endang Allah Taala kitai.
    Pesan Iya endang ke semua dunya.

    Saut: Sembah meh TUHAN berari.

    Alleluia (peda Mark 1: 15)

    Alleluia, alleluia
    Perintah Allah Taala nyau semak!
    Nesal ati ke dosa kita, lalu arapka Berita Manah!
    Alleluia.

    Bacha Injil

    Matthew 10: 1 - 7

    Jesus lalu ngangauka dua belas iku murid ngagai Iya, lalu meri sida kuasa muru roh ti jai, sereta ngeraika semua macham pemedis enggau penyakit.

    Tu nama sida ke dua belas iku nya: Simon, ke dikumbai Peter, enggau menyadi iya Andrew; James anak Sebedi, enggau menyadi iya John;
    Philip enggau Bartolomew; Thomas enggau Matthew ke pengumpul chukai, James anak Alpius enggau Tadeus;
    Simon ke digelar bujang berani, enggau Judas Iskariot, ke nyual Jesus.

    Sida ke dua belas iku nya lalu diasuh Jesus bejalai. Ku Iya, “Anang bejalai ngagai orang bansa bukai, tauka ngagai nengeri orang Samaria, tang bejalai ngagai orang Israel ke tesat baka bedus.

    Lebuh kita bejalai, padahka Berita Manah tu: ‘Perintah serega nyau semak!’”

    No comments

    Post Top Ad