#InjilSeharitu: 12 July 2018 - Hari Empat ba Minggu Ke Empat Belas Musim Selama - Berita Iban Online

Header Ads

  • Baru Nyadi

    #InjilSeharitu: 12 July 2018 - Hari Empat ba Minggu Ke Empat Belas Musim Selama



    Selamat pagi, 12 July 2018 - Hari Empat ba Minggu Ke Empat Belas Musim Selama, ngagai pemacha BeritaIban.com.

    Bacha Ke Satu:

    Hosea 11: 1 - 4, 8E - 9

    Ku TUHAN bejaku:
    Lebuh Israel agi mit, Aku rinduka iya lalu Aku ngangauka anak Aku pansut ari menua Ejip.

    Tang makin bebendar agi Aku ngangauka iya, makin jauh agi ga iya ninggalka Aku. Bala nembiak Aku ngenjuk piring ngagai Baal. Sida nunu menyan ngagai engkeramba.

    Aku udah ngiring lalu ngajar orang Israel bejalai. Aku udah merap bala nembiak Aku tang sida enda ngaku Aku udah ngeraika sida.

    Aku nguluka sida enggau penelap sereta enggau pengerindu. Aku ngangkatka sida ngagai kuyu Aku. Aku ngenduk lalu nyapi sida.

    Ati Aku sigi enggai ngereja nya! Ati Aku kelalu balat rinduka kita.
    Aku enggai ngukum kita lebuh Aku ringat. Aku enggai agi ngerusak Israel, laban Aku tu Allah Taala, ukai mensia, Aku ti kudus, ke meruan enggau kita. Aku enggai datai ngagai kita lebuh Aku ringat.

    Masmur Entara:

    Masmur 80: 1AC & 2B, 14 - 15

    Saut (peda 3b): Ayanka pengasih Nuan ke kami, TUHAN, ngambika kami diidupka.

    Ke Satu
    Pendingka kami, O Pengibun orang Israel.
    Nuan ke duduk ba kerusi diraja Nuan
    ari atas melikat cherub ti besayap,
    pandangka pengering Nuan ngagai kami.

    Saut: Ayanka pengasih Nuan ke kami, TUHAN, ngambika kami diidupka.

    Ke Dua
    Kuingka Diri ngagai kami, O Allah Taala ti Pemadu Bekuasa! Tilik ari serega ngagai kami di baruh ditu.

    Datai lalu selamatka bala nembiak Nuan!
    Datai lalu selamatka batang anggur ti udah ditanam Nuan, batang anggur ti muda tu, ti udah diasuh Nuan kering!

    Saut: Ayanka pengasih Nuan ke kami, TUHAN, ngambika kami diidupka.

    Alleluia (peda Mark 1: 15)

    Alleluia, alleluia
    Perintah Allah Taala nyau semak!
    Nesal ati ke dosa kita, lalu arapka Berita Manah!
    Alleluia.

    Bacha Injil

    Matthew 10: 7 - 15

    Ku Jesus bejaku ngagai rasul Iya:
    “Lebuh kita bejalai, padahka Berita Manah tu: ‘Perintah serega nyau semak!’
    Geraika orang ke sakit, angkatka orang ke mati pulai idup baru, geraika orang ke sakit lan, buru antu. Kita udah nerima ngena chara pechuma,  nya alai beri ngena chara pechuma.

    Anang mai duit emas tauka pirak tauka duit engkeraju.

    Anang mai kambut lebuh kita bejalai, tauka baju kena besilih, tauka selipar, tauka tungkat, laban orang ke bekereja endang patut diberi utai ti dipeguna iya.

    Lebuh kita datai ba nengeri tauka genturung pendiau, giga orang ke deka nerima kita, lalu diau enggau iya datai ke kita angkat ari endur nya.

    Lebuh kita tama ngagai rumah orang, beri jaku tabi ngagai rumah nya.

    Enti orang dalam rumah nya nerima kita, awakka jaku tabi kita mengkang dia. Tang enti sida enggai nerima kita, ambi pulai baru jaku tabi kita nya.

    Lalu enti orang enggai nerima kita tauka enggai mendingka kita, tesai abus ari kaki kita lebuh kita angkat ari rumah tauka ari nengeri nya.

    Enggau bendar Aku madah ngagai kita, lebuh Hari Pechara ila, Allah Taala deka lebih agi kasihka orang Sodom enggau orang Gomorah, ari ke kasihka orang ke di nengeri nya.”

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads