Header Ads

  • Berita Tebaru

    #InjilSeharitu: 13 July 2018 - Hari Lima ba Minggu Ke Empat Belas Musim Selama

    “Aku ngasuh kita bejalai baka bedus ngagai raban ukui kampung. Nya alai kita enda tau enda pintar baka ular, sereta nelap baka burung achang.

    Selamat pagi, 13 July 2018 - Hari Lima ba Minggu Ke Empat Belas Musim Selama, ngagai semua pemacha BeritaIban.com.

    Bacha Ke Satu:

    Hosea 14: 1 - 9

    Ku TUHAN bejaku:
    O kita orang Israel, pulai meh kita baru ngagai TUHAN Allah Taala kita. Dosa kita udah ngasuh kita tesangkut lalu tetingkap.

    Pulai meh kita baru ngagai TUHAN, lalu awakka sampi tu nyadika piring kita ngagai Iya: “Buai semua dosa kami, lalu terima meh sampi kami, lalu kami deka muji Nuan munyi ti udah disemaya kami.

    Asiria nadai ulih ngidupka kami, lalu kuda perang enda ulih nyaga kami. Kami enggai agi nyebut ngagai engkeramba kami, ngumbai sida nya Allah Taala kami. O TUHAN, Nuan kasihka orang ke nadai petara bukai alai sida ngadap.”

    Ku TUHAN bejaku, “Aku deka mai bala nembiak Aku pulai baru ngagai Aku. Aku deka rinduka sida enggau pengabis ati Aku. Aku enda agi ringat ngagai sida.

    Ba orang Israel, Aku deka nyadi baka ujan ti labuh ba tanah ti rangkai. Sida deka bekuntum baka bungai. Sida deka beurat tegap baka kayu di menua Lebanon.

    Sida deka idup lalu nelesak baru, sereta manah gaya baka kayu kana. Sida deka bebau rengut baka kayu sidar di menua Lebanon.

    Sekali agi sida deka idup dilindung Aku. Sida deka galak baka gandum lalu sida deka bebuah lebat baka kebun anggur. Sida deka beberita baka wain menua Lebanon.
    Orang Israel enggai agi bekaul enggau engkeramba. Aku deka nyaut sampi sida, lalu ngibun sida. Baka kayu ti enda nemu layu, Aku deka ngelindung sida. Aku tu meh penatai semua berekat sida.”

    Awakka sida ke bepenemu-dalam meretika utai ti ditulis ditu, lalu awakka sida nyimpan utai nya dalam ati sida. Jalai TUHAN endang ngena, lalu orang ke lurus sigi idup nitihka jalai nya, tang orang ke bedosa tesangkut lalu tetingkap laban sida enda begunaka jalai nya.

    Masmur Entara:

    Masmur 51: 1 - 2, 6 - 7, 10 - 11, 12 & 15

    Saut (peda 15b): Aku deka muji Nuan, O TUHAN.

    Ke Satu
    Kasihka aku, O Allah Taala, laban pengerindu Nuan endang meruan.
    Laban pengasih Nuan endang besai, buai meh dosa aku!
    Buai abis semua penyai aku
    lalu tuchi aku ari dosa aku!

    Saut: Aku deka muji Nuan, O TUHAN.

    Ke Dua
    Nuan begunaka pemendar enggau ati ti lurus,
    nya alai isi meh runding aku enggau penemu-dalam ti datai ari Nuan.
    Buai dosa aku, lalu aku deka nyadi tuchi.
    Basu aku, lalu aku deka nyadi burak agi ari seleju.

    Saut: Aku deka muji Nuan, O TUHAN.

    Ke Tiga
    Gaga ati aku tuchi, O Allah Taala,
    lalu simpan roh ti baru sereta taluk, dalam aku.
    Anang muai aku ari mua Nuan.
    Anang ngambi Roh Kudus Nuan ari aku.

    Saut: Aku deka muji Nuan, O TUHAN.

    Ke Empat
    Pulaika aku baru ngagai pengaga ti datai ari pengelepas Nuan,
    lalu asuh aku rajin ngasika Nuan.
    Tulung aku bejaku, O TUHAN,
    lalu aku deka muji Nuan.

    Saut: Aku deka muji Nuan, O TUHAN.

    Alleluia (peda John 16: 13A; 14: 26D)

    Alleluia, alleluia
    Lebuh Roh pemendar datai,
    Iya deka ngiring kita ngagai semua pemendar,
    lalu ngasuh kita ingatka semua utai ti udah disebut Aku ngagai kita.
    Alleluia.

    Bacha Injil

    Matthew 10: 16 - 23

    Ku Jesus bejaku ngagai Rasul Iya:
    “Aku ngasuh kita bejalai baka bedus ngagai raban ukui kampung. Nya alai kita enda tau enda pintar baka ular, sereta nelap baka burung achang.

    Bejaga kita ari sida, laban sida deka nangkap kita, lalu ngirit kita ngagai kot, lalu nyipat kita dalam balai gempuru sida.

    Kita deka kena pechara di mua gabenor enggau raja ketegal Aku, ngambika kita besaksika pasal Aku ngagai sida enggau ngagai orang bansa bukai.

    Lebuh sida nyerahka kita ngambika kita kena pechara, anang irauka jalai kita deka bejaku tauka utai ti deka disebut kita, laban kita deka diberi utai ti deka disebut kita lebuh maya nya, laban ukai kita ke bejaku, tang Roh Apai kita ti bejaku ngena kita.                 
    Menyadi deka nyerahka menyadi ngambika sida dibunuh, lalu apai deka nyerahka anak. Anak deka angkat ngelaban apai indai, lalu ngasuh sida dibunuh.

    Lalu semua orang deka begedika kita ketegal nama Aku. Tang orang ke tan datai ke ujung, deka diselamatka.

    Lebuh sida merinsaka kita ba nengeri siti, rari ngagai nengeri siti, laban enggau bendar Aku madah ngagai kita, kita enda ulih nembuka pengawa kita dalam semua nengeri di menua Israel sebedau Anak Mensia datai.”

    No comments

    Post Top Ad