Header Ads

  • Berita Tebaru

    #InjilSeharitu: 14 July 2018 - Hari Enam ba Minggu Ke Empat Belas Musim Selama

    Nya alai, anang takut. Kita berega agi ari burung pipit!

    Selamat pagi, 14 July 2018 - Hari Enam ba Minggu Ke Empat Belas Musim Selama, ngagai BeritaIban.com.

    Bacha Ke Satu:

    Isaiah 6: 1 - 8

    Taun Raja Usiah mati, aku bisi meda TUHAN duduk ba kerusi diraja Iya, tinggi sereta bemulia, lalu baju panjai Iya ngemenuhka Rumah Sembiang.

    Melikat serapim bediri ari atas Iya. Genap iku melikat nya bisi enam iti sayap: dua iti sayap dikena iya mungkur mua iya, lalu dua iti dikena iya mungkur kaki iya, lalu dua iti dikena iya terebai.

    Sida ngangauka pangan diri, ku sida: “Kudus, kudus, kudus! meh TUHAN ti Pemadu Bekuasa! Semua dunya penuh laban mulia Iya.”

    Tiang pemun Rumah Sembiang berenyang laban penginggar nyawa iya ke ngangau, lalu Rumah Sembiang nya penuh laban asap.

    Ku aku bejaku, “Tulah meh aku tu! Nadai penyadi meh aku tu; laban mulut aku nyebut utai ti kamah, lalu aku diau enggau orang ke besebutka jaku ti kamah; tang taja pia, mata aku udah meda Raja, TUHAN ti Pemadu Bekuasa!”

    Udah nya siku melikat serapim terebai ngagai aku, mai bara api ti udah diambi iya ngena sepit ari alta.

    Iya negu mulut aku ngena bara api nya, lalu ku iya bejaku, “Bara api tu udah negu mulut nuan. Diatu penyalah nuan udah dibuai, lalu dosa nuan udah diampun.”

    Aku lalu ninga TUHAN bejaku, “Sapa orang ke patut dikirumka Aku? Sapa orang ke deka nyadi seruan kitai?” Aku lalu nyaut, “Aku, TUHAN! Kirumka aku!”

    Masmur Entara:

    Masmur 93: 1AB,  1CD - 2, 5

    Saut (peda 1a): TUHAN endang Raja; Iya begari ngena mulia.

    Ke Satu
    TUHAN endang Raja!
    Iya begari ngena mulia enggau pengering.

    Saut: TUHAN endang Raja; Iya begari ngena mulia.

    Ke Dua
    Dunya diatur tegap lalu enda ulih dikinsitka.
    Kerusi diraja Nuan, O TUHAN,
    endang udah tegap kenyau ari pun
    lalu Nuan endang udah bisi sebedau dunya nyadi.

    Saut: TUHAN endang Raja; Iya begari ngena mulia.

    Ke Tiga
    Adat Nuan endang meruan belama iya, O TUHAN,
    lalu Rumah Nuan endang amat kudus,
    belama lama iya.

    Saut: TUHAN endang Raja; Iya begari ngena mulia.

    Alleluia (peda 1 Peter 4: 14)

    Alleluia, alleluia
    Enti kita dikeleseka orang ketegal nama Kristus, kita bulih berekat,
    laban Roh Allah Taala bisi enggau kita.
    Alleluia.

    Bacha Injil

    Matthew 10: 24 - 33

    Ku Jesus bejaku ngagai Rasul Iya:
    “Murid nadai kala lebih ari pengajar iya, lalu ulun nadai kala lebih ari tuan iya.

    Nya alai, murid patut nemu puas ati enti iya sebaka enggau pengajar iya, lalu ulun sebaka enggau tuan iya. Enti tuai bilik dikumbai Belsebup, sida sebilik tentu deka dikumbai ngena nama ti jai agi ari nya!

    “Nya alai, anang takutka sida, laban nadai utai ti ditudung enda dikebakka, tauka dilalaika lalu enda ditemu.

    Utai ti dipadahka Aku ngagai kita dalam petang, enda tau enda ditusui kita lebuh siang hari, lalu utai ti dipetelaika Aku ngagai kita, enda tau enda disadaka kita ari puchuk perabung.

    Anang takutka sida ke munuh tubuh, tang enda ulih munuh semengat. Tang kita patut nangika Allah Taala ti ulih ngerusak tubuh enggau semengat kita di neraka.

    Ukai enda rega burung pipit ka semina satu sen aja? Taja pia, nadai siku sida deka labuh ke tanah, enti Apai kita enda ngemendarka nya.

    Indah semua lambar buk ba pala kita deh udah diitung magang.

    Nya alai, anang takut. Kita berega agi ari burung pipit!

    Nya alai genap iku orang ke ngaku diri nembiak Aku di mua orang, deka diaku Aku di mua Apai Aku di serega.

    Tang barang sapa besangkalka Aku di mua orang, deka disangkalka Aku di mua Apai Aku di serega.”

    No comments

    Post Top Ad