#InjilSeharitu: 26 July 2018 - Hari Empat ba Minggu Ke Enam Belas Musim Selama - Berita Iban Online

Header Ads

  • Baru Nyadi

    #InjilSeharitu: 26 July 2018 - Hari Empat ba Minggu Ke Enam Belas Musim Selama



    26 July 2018 - Hari Empat ba Minggu Ke Enam Belas Musim Selama (Memorial of Saints Joachim and Anne, Parents of the Blessed Virgin Mary)

    Bacha Ke Satu:

    Jeremiah 2: 1 - 3, 7 - 8, 12 - 13

    TUHAN ngasuh aku madahka pesan tu ngagai semua orang di Jerusalem.
    “Aku ingatka penetap ati nuan, Israel, lebuh nuan agi biak, pemendar nuan rinduka Aku, lebuh tua terubah jadi enggau pangan diri. Nuan nitihka Aku nengah menua puang, nengah menua ti nadai kala ditanam enggau utai.
    Israel, nuan endang enggi Aku siku aja. Nuan endang pesaka Aku ti kudus. Aku ngasuh pemerinsa enggau penusah ti besai ninggang semua orang ke ngemediska nuan. Aku ti TUHAN, udah bejaku.”

    Aku mai sida ngagai menua ti ami, ngambika sida ngelantangka diri ngena utai ti diketau enggau utai bukai ti manah di menua nya. Tang sida ngerusak menua Aku. Sida ngamahka menua ti udah diberi Aku ngagai sida.
    Sida imam nadai nanya, ‘Dini alai TUHAN?’ Bala imam Aku Empu enda ngelala Aku. Bala raja angkat ngelaban Aku. Bala nabi bejaku dalam nama Baal lalu nyembah engkeramba ti nadai guna.

    Nya alai Aku ngasuh langit berenyang laban takut, tenganga alit ati, laban bala nembiak Aku udah ngereja dua bengkah dosa, iya nya, sida udah ninggalka Aku ti nyadi mata ai ti idup, lalu sida udah numbak telaga telaga ti merekah ti enda ulih ngundan ai.”

    Masmur Entara:

    Masmur 36: 5 - 6AB, 7 - 8, 9 - 10

    Saut (9a): Nuan endang pun pengidup, O TUHAN.

    Ke Satu
    O TUHAN, pengerindu Nuan ti meruan belama iya
    endang tinggi agi ari langit.
    Penetap ati Nuan tinggi agi ari remang.
    Pengelurus Nuan tinggi baka bukit ti pemadu tinggi.
    Pengelurus atur Nuan baka penalam tasik.

    Saut: Nuan endang pun pengidup, O TUHAN.

    Ke Dua
    Naka meh pemadas pengerindu Nuan ti meruan belama iya, O Allah Taala!
    Kami belindung di baruh sayap Nuan.
    Kami makai mayuh macham pemakai ti disediaka Nuan ke kami.
    Nuan meri kami ai irup ari sungai Nuan ti manah.

    Saut: Nuan endang pun pengidup, O TUHAN.

    Ke Tiga
    Nuan endang pun pengidup,
    lalu kami ulih meda penampak laban penampak Nuan.
    Awakka Nuan seruran rinduka orang ke nemu Nuan,
    lalu ngereja utai ti manah ngagai orang ke lurus.

    Saut: Nuan endang pun pengidup, O TUHAN.

    Alleluia (peda Matthew 11: 25)

    Alleluia, alleluia
    Pujika Nuan Apai, Tuhan ke bekuasa di serega enggau di dunya,
    laban Nuan udah mandangka misteria Perintah ngagai bala anak mit.
    Alleluia, alleluia.

    Bacha Injil:

    Matthew 13: 10 - 17

    Udah nya sida murid datai lalu bejaku enggau Iya,
    “Nama kebuah Nuan bejaku ngagai sida ngena jaku sempama?”
    Ku Iya nyaut sida,
    “Kita udah diberi penemu pasal misteri Perintah serega, tang penemu nya apin diberi ngagai sida.

    Laban orang ke bisi utai, deka diberi mayuh agi, lalu iya deka ngembuan mayuh agi utai, tang orang ke nadai utai, indah utai ti mimit ti dikemisi iya deh deka dirampas ari iya.

    Nya kebuah Aku bejaku ngagai sida ngena jaku sempama, ngambika sida merening, tang enda meda, mending, tang enda ninga tauka mereti.
    Ba sida tu meh jaku nabi Isaiah dikamatka:

    ‘Kita amat deka mending, tang enda mereti, lalu kita amat merening, tang enda meda.
    Laban sida enda nemu berunding, lalu pending sida bengal, lalu sida udah nutup mata sida, enggai ke sida meda ngena mata sida, lalu ninga ngena pending sida, lalu mereti ngena ati sida, lalu nguingka diri ngagai Aku, lalu Aku ngeraika sida.’

    “Tang beberekat meh mata kita, laban sida meda, enggau pending kita, laban sida ninga.

    Enggau bendar Aku madah ngagai kita, mayuh nabi enggau orang ke lurus ingin deka meda utai ti dipeda kita, tang nadai meda utai nya, lalu ingin deka mendingka utai ti dipendingka kita, tang nadai ninga utai nya.”

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads