Header Ads

  • Berita Tebaru

    #InjilSeharitu: 3 July 2018 - Hari Dua ba Minggu Ke Tiga Belas Musim Selama

    Jesus datai lalu bediri ba tengah-tengah sida, lalu bejaku, “Awakka pemaik meruan enggau kita.” John 20: 24 - 29

    Selamat pagi, 3 July 2018 - Hari Dua ba Minggu Ke Tiga Belas Musim Selama (Feast of Saint Thomas, Apostle), ngagai semua pemacha BeritaIban.com.

    Bacha Ke Satu:

    Epesus 2: 19 - 22

    Menyadi:
    Nya alai, kita ukai temuai agi, ukai orang kampar agi, tang sama nyadi peranak enggau bala nembiak Tuhan, nyadi raban ruang bilik Allah Taala.

    Ruang bilik nya didirika ba atas pugu ti didudukka sida rasul enggau sida nabi, lalu Jesus Kristus Empu nyadika batu pemun nya.

    Dalam Iya semua perengka rumah nya dipejantilka lalu mansang nyadi rumah sembiang ti kudus dalam Tuhan.

    Lalu dalam Iya kita mega didirika nyadi rumah alai Roh Allah Taala diau.

    Masmur Entara:

    Masmur 117: 1, 2

    Saut (peda Mark 16: 15): Bejalai kita ngagai serata dunya, lalu tusui Berita Manah ngagai semua mensia.

    Ke Satu
    Puji meh TUHAN, O kita semua bansa!
    Puji meh Iya, semua kita mensia!

    Saut: Bejalai kita ngagai serata dunya, lalu tusui Berita Manah ngagai semua mensia.

    Ke Dua
    Laban pengerindu Iya ke kitai endang besai sereta meruan belama iya, lalu penetap ati TUHAN endang meruan belama iya.

    Saut: Bejalai kita ngagai serata dunya, lalu tusui Berita Manah ngagai semua mensia.

    Alleluia (peda John 20: 29)

    Alleluia, alleluia
    Nuan arap ke Aku, Thomas, laban nuan udah meda Aku, ku TUHAN;

    Beberekat meh orang ke arap, taja pen sida enda meda Aku!
    Alleluia.

    Bacha Injil

    John 20: 24 - 29

    Thomas (ke dikumbai Besapit), siku ari sida ke dua belas, nadai enggau sida lebuh Jesus datai.

    Nya alai sida murid ti bukai madah ngagai iya, “Kami udah meda Tuhan!” Tang ku Thomas bejaku ngagai sida, “Enti aku enda meda abi paku lawang ba jari Iya, lalu ngachukka tunjuk aku ngagai abi paku lawang nya, lalu ngengkahka jari aku ba rusuk Iya, aku enggai arap.”

    Seminggu udah bekau nya, sida murid Iya begempuru baru ba rumah nya, lalu Thomas bisi enggau sida. Taja pen pintu udah ditutup, tang Jesus datai lalu bediri ba tengah-tengah sida, lalu bejaku, “Awakka pemaik meruan enggau kita.”

    Iya lalu bejaku ngagai Thomas, “Engkahka tunjuk nuan ditu, lalu peda jari Aku. Unjur lalu engkahka jari nuan ba rusuk Aku.

    Anang kakang ati, tang arap!” Thomas lalu nyaut Iya, “Tuhan aku, Allah Taala aku!”

    Jesus lalu nyebut ngagai iya, “Kati nuan arap laban nuan udah meda Aku?.

    Beberekat meh orang ke arap, taja pen sida enda meda Aku!”

    No comments

    Post Top Ad