#InjilSeharitu: 4 July 2018 - Hari Tiga ba Minggu Ke Tiga Belas Musim Selama - Berita Iban Online

Header Ads

  • Baru Nyadi

    #InjilSeharitu: 4 July 2018 - Hari Tiga ba Minggu Ke Tiga Belas Musim Selama

    Tekala nya seduai iya lalu merakka nyawa bejaku, “Nama guna Nuan enggau kami, Nuan Anak Allah Taala? Kati Nuan datai deka merinsaka kami sebedau maya ti patut?”

    Selamat pagi, 4 July 2018 - Hari Tiga ba Minggu Ke Tiga Belas Musim Selama, ngagai semua pemacha BeritaIban.com.

    Bacha Ke Satu:

    Amos 5: 14 - 15, 21 - 24

    Kita patut ngereja utai ti ngena, ukai ngereja penyai, ngambika kita ulih idup.

    Nya baru TUHAN Allah Taala ti Pemadu Bekuasa deka meruan enggau kita, munyi ti ku kita.

    Begedika utai ti jai, rinduka utai ti ngena, lalu beri atur ti lurus dalam kot. Nyangka ukur TUHAN deka kasihka orang Israel ti agi idup.

    Ku TUHAN bejaku, “Aku begedika gawai pengarap kita. Aku enggai meda utai nya!
    Lebuh kita mai piring tunu, enggau piring tepung ngagai Aku, Aku enggai nerima utai nya. Aku enggai nerima jelu ti gemu ti dienjuk kita ngagai Aku nyadika piring kita.

    Badu agi kita belagu. Aku enggai ninga musik belikan kita.

    Tang awakka atur ti lurus rarat baka ai sungai, lalu awakka pengelurus baka sungai ti enda nemu langkang.

    Masmur Entara:

    Masmur 50: 7, 8 - 9, 10 - 11, 12 - 13, 16BC - 17

    Saut (peda 23b): Allah Taala deka ngelepaska semua orang ke ngasika Iya.

    Ke Satu
    “Pendingka Aku, kita ke nembiak Aku. Aku deka bejaku.

    Aku deka besaksi ngelaban kita, Israel.
    Aku tu Allah Taala, ti Allah Taala kita.”

    Saut: Allah Taala deka ngelepaska semua orang ke ngasika Iya.

    Ke Dua
    “Aku ukai nganu kita ketegal piring kita
    tauka ketegal piring tunu ti selalu dibai kita ngagai Aku.

    Aku enda begunaka sapi ti lelaki ari umai kita tauka kambin ari raban jelu kita.”

    Saut: Allah Taala deka ngelepaska semua orang ke ngasika Iya.

    Ke Tiga
    “Semua jelu di babas endang enggi Aku magang,
    sama enggau sapi ti ba beribu igi munggu.

    Semua burung di babas, endang enggi Aku magang, sama enggau semua utai ti idup di padang.”

    Saut: Allah Taala deka ngelepaska semua orang ke ngasika Iya.

    Ke Empat
    “Enti sema Aku lapar, enda meh Aku minta pemakai ari kita, laban dunya, enggau semua utai ti dalam iya, endang enggi Aku magang.

    Kati Aku makai isi sapi tauka ngirup darah kambin?”

    Saut: Allah Taala deka ngelepaska semua orang ke ngasika Iya.

    Ke Lima
    “Nama kebuah kita besebutka pesan Aku?

    Nama kebuah kita berandauka sempekat Aku?

    Kita enggai ngelakka Aku ngajar kita.
    Kita nulak pesan Aku.”

    Saut: Allah Taala deka ngelepaska semua orang ke ngasika Iya.

    Alleluia (peda James 1: 18)

    Alleluia, alleluia
    Ari peneka Iya Empu, Allah Taala udah ngadaka kitai, ulih jaku pemendar,
    ngambika kitai nyadi lumur satu ari semua utai ti idup ti digaga Iya.
    Alleluia.

    Bacha Injil

    Matthew 8: 28 - 34

    Lebuh Jesus datai di menua Gadara, di seberai danau nya, dua iku lelaki ke dirasuk antu pansut ari pendam lalu mansang ngagai Iya. Seduai tu mangah amat, datai ke orang nyau nadai berani bejalai nengah jalai nya.

    Tekala nya seduai iya lalu merakka nyawa bejaku, “Nama guna Nuan enggau kami, Nuan Anak Allah Taala? Kati Nuan datai deka merinsaka kami sebedau maya ti patut?”

    Nyadi enda jauh ari endur nya bisi raban babi, benung makai.

    Lalu ku bala antu nya bejaku ngagai Jesus, “Enti Nuan muru kami, awakka kami tama ngagai raban babi nya.”

    Lalu ku Iya bejaku ngagai sida, “Mupuk meh kita!” Sida mupuk, lalu tama ngagai raban babi nya. Semua babi nya lalu belanda nurun tebiang, terejun ngagai danau, lalu mati lemas.

    Orang ke ngibun raban babi nya lalu rari, tama ngagai nengeri, lalu madahka semua utai nya, enggau pasal utai ti udah nyadi ba orang ke dirasuk antu nya.

    Genap iku orang lalu pansut ari nengeri nya deka betemu enggau Jesus, lalu lebuh sida meda Iya, sida lalu minta Iya mupuk ari menua sida.

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads