Header Ads

  • Berita Tebaru

    #InjilSeharitu: 9 July 2018 - Hari Satu ba Minggu Ke Empat Belas Musim Selama

    Jesus nguing, tepedaka indu nya, lalu bejaku, “Anak, anang takut! Pengarap nuan udah ngeraika nuan.” Indu nya lalu gerai tekala nya.

    Selamat pagi, 9 July 2018 - Hari Satu ba Minggu Ke Empat Belas Musim Selama, ngagai semua pemacha BeritaIban.com.

    Bacha Ke Satu:

    Hosea 2: 14, 15C - 16, 19 - 20

    Ku TUHAN bejaku:
    Nya alai Aku deka mai iya ngagai menua puang, laban Aku deka ngulihka ati iya baru ngena jaku ti siru.

    Iya deka nyaut Aku dia baka iya ti udah nyaut Aku lebuh iya agi biak suba, lebuh iya datai ari menua Ejip.

    Udah nya baru iya deka sekali agi ngumbai Aku laki iya, lalu enda agi ngumbai Aku Baal  iya.

    Israel, Aku deka ngambi nuan nyadika bini Aku dalam pengelurus, sereta tetap ati ngagai nuan. Aku deka seruran rindu sereta kasihka nuan lalu bempu nuan belama iya.

    Aku deka ngamatka semaya Aku, lalu ngaga nuan nyadika enggi Aku, lalu nuan deka ngaku Aku nyadika TUHAN nuan.

    Masmur Entara:

    Masmur 145: 2 - 3, 4 - 5, 6 - 7, 8 - 9

    Saut (peda 8a): TUHAN endang rindu sereta kasih.

    Ke Satu
    Tiap hari aku deka meri terima kasih ngagai Nuan, lalu muji nama Nuan belama lama iya.
    TUHAN endang besai lalu endang patut dipuji.

    Pemesai kuasa Iya enda ulih diperagam mensia.

    Saut: TUHAN endang rindu sereta kasih.

    Ke Dua
    Utai ti udah dikereja Nuan deka dipuji genap turun-menurun.

    Sida deka madahka pasal pemesai pengawa Nuan.

    Sida deka bejakuka pasal mulia enggau pemesai kuasa Nuan, lalu aku deka belematika pemadas pengawa Nuan.

    Saut: TUHAN endang rindu sereta kasih.

    Ke Tiga
    Orang deka ngenang pasal pemesai pengawa Nuan, lalu aku deka ngemesaika Nuan.

    Sida deka nusui pasal semua pemadas Nuan lalu belaguka pasal penelap Nuan.

    Saut: TUHAN endang rindu sereta kasih.

    Ke Empat
    TUHAN endang rindu sereta kasih,
    lubah ringat sereta penuh laban pengerindu ti meruan belama iya.

    Iya manah enggau semua orang
    lalu siru enggau semua utai ti udah digaga Iya.

    Saut: TUHAN endang rindu sereta kasih.

    Alleluia (peda 2 Timoti 1: 10)

    Alleluia, alleluia
    Juruselamat kitai, Jesus Kristus udah ngerusak pemati, lalu udah mandangka pengidup ti meruan belama iya ulih Berita Manah.
    Alleluia.

    Bacha Injil

    Matthew 9: 18 - 26

    Lebuh Jesus agi benung bejaku ngagai sida, siku pemesai orang Judah datai, besugang di mua Iya, lalu bejaku, “Anak indu aku baru udah mati.

    Tang aku minta Nuan datai lalu ngengkahka jari Nuan ba atas iya, ngambika iya idup baru.”

    Jesus angkat lalu nitihka iya, sama enggau sida murid Iya.

    Siku indu ke sakit begetah dua belas taun datai ari belakang, lalu negu puting kelambi Jesus, laban ku indu nya bejaku dalam ati diri, “Enti aku negu gari Iya, aku deka gerai.”

    Jesus nguing, tepedaka indu nya, lalu bejaku, “Anak, anang takut! Pengarap nuan udah ngeraika nuan.” Indu nya lalu gerai tekala nya.

    Lebuh Jesus datai ba rumah pemesai nya, lalu tepedaka bala orang ke besepuka kesuling, enggau orang ke begau, Iya lalu bejaku, “Pansut kita ari tu! Laban anak mit tu ukai mati, tang tinduk!” Sida lalu ketawaka Iya.

    Tang lebuh semua orang udah diburu pansut, Jesus tama, lalu megai jari anak mit nya. Anak mit nya lalu angkat.

    Berita pasal nya ngelekai di serata menua nya.

    No comments

    Post Top Ad